په کابل کې د کورونو بیې او کرايې ټيټې شوې دي

کابل (پژواک، ٤ وږى ١٤٠٠): په پلازمېنې کابل کې په دې وروستيو کې د کورونو بیې او کرايې ټېټې شوې خو تر ډېره پېر او پلور نشته دى.

د کابل ښار او شاوخوا سيمو د معاملاتو د لارښوونې دفترونو يو شمېر مسوولينو له پژواک اژانس سره په ځانګړو مرکو کې ويلي چې په دې وروستيو کې یې کاروبار په ټپه ولاړ دی او خلک د کورونو اخيستلو ته زړه نه ښه کوي.

روحاني چې د کابل ښار د تایمني په څلورم سړک کې د دل ارام په نوم رهنما لري پژواک ته وویل چې د کورنو پېر او پلور په ټپه ولاړ دى.

دی وایي: ((مخکې به د ورځې تر ٢٠ پورې کسان راتلل او د کورونو د اخيستلو پوښتنه به يې کوله خو اوس دوه کسان هم نه راځي.))

د نوموړي د معلوماتو له مخې، پخوا په دې سيمه کې يوه بیسوه ځمکه له پنځوس څخه تر ١٢٠ زره ډالرو پورې وه، خو اوس يې بيې ٣٠ او ٨٠  زرو ډالرو ته ښکته شوې دي.

ده وويل، مخکې يو هغه کور چې څلور خونې يې درلودې په ٩٠ زره ډالره پلورل کېده، اوس يې بيه ٧٥ زرو ته ښکته شوې خو بيا يې هم څوک نه اخلي.

د هغه په وينا، په دې سيمه کې پخوا د يوه درې اتاقه کور کرايه شاوخوا درې سوه ډالره وه، اوس يې کرايه ٢٠٠ ډالرو ته ښکته شوې خو بيا يې هم څوک نه نيسي.

دى زياتوي: ((په ټوليزه توګه کار وبار هیڅ نشته، نه څوک کور په کرايه نيسي نه يې څوک اخلي او نه يې هم څوک ګرو نيسي.))

همدارنګه د کابل د کارته پروان سيمې د عظيم رهنما منشي ذاکرالله پژواک ته وويل چې پخوا په دې سيمه کې يوه بسوه ځمکه له ٤٠ تر ٨٠ زرو ډالرو پورې پلورل کېده، خو اوس يې نرخونه ٣٠ زرو ډالرو را ښکته شوي دي.

دى وايي: ((همدغسې کرايه هم ښکته شوې خو څوک يې نه په بيه اخلي او نه هم څوک کور په کرايه نيسي.))

د نوموړي په وينا، پخوا به يې په يوه مياشت کې دوه يا درې کورونه په کرايه ورکول، په ګرو به يې ورکول او يا به يې هم پلورل، خو په تېرو دوه اوونيو کې يې هیڅ معامله نه ده ترسره کړې.

همدارنګه د کابل ښار د کلوله پشتې په سیمه کې د مجتبی په نوم د یوې رهنما مسوول محمد یاسین پژواک ته وویل چې مخکې یې کارونه ښه و، خو اوس یې کاروبار په ټپه ولاړ دى.

هغه وویل، تر اوسه د حکومت برخليک معلوم نه دی، نو ځکه خلک د کورونو پلور ته زړه نه ښه کوي.

نوموړي وویل: ((له هغې ورځې څخه چې په حکومت کې بدلون راغلی چا بیخي د کورونو د پير پوښتنه هم نه ده کړې، خو ځینې خلک په کرایه کورونه غواړي او په ګرو هم څوک کور نه اخلي.))

دغه راز د کابل ښار اوسېدونکي هم وايي چې په دې وروستيو کې هر ډول کار وبار په ټپه ولاړ دى.

د کابل ښار د پنجصد فاميلي سيمې اوسېدونکي محمد مجيب پژواک ته وويل چې د کورونو د خرڅلاو ترڅنګ د نورو کاروبارونو چارې هم په ټپه ولاړې دي.

دى وايي: ((زه دلته د خوراکه فروشۍ دوکان لرم، مخکې مې د ورځې تر لسو زرو پورې سودا کوله يو زر دوه زره روپۍ راته پاتې کېدې، خو اوس د ورځې دوه زره افغانۍ فروش هم نه شم کولاى.))

دغه راز د کابل د احمدشاه بابا سيمې اوسېدونکي محمد الياس پژواک ته وويل چې د حکومت له بدلون سره په هره برخه کې ژور توپير راغلى دى.

دى وايي، چې طالبان بايد هرڅه ژر خپل حکومت اعلان او هرې برخې ته مسوول وټاکي ترڅو چارې د پخوا په څېر بېرته عادي شي.

د اړوندې موضوع په اړه د طالبانو مرستیال ویاند احمد الله وثیق پژواک ته وویل چې ډېر ژر به دوی خپله کابینه اعلان کړي او فعالیت به پيل کړي.

هغه وویل چې اوس هم ځينو ادارو خپل فعالیتونه پیل کړي او د خلکو په خدمت کې دي او ډېر ژر به نورې ادارې هم خپل فعالیتونه پيل کړي.

نوموړی وایي، ډېر ژر به سوداګرو ته اسانتیاوې برابری کړي چې خپل کارونه مخته یوسي.

دی وايي، په ښار کې ټول مارکېټونه خلاص دي خو لږ وخت ته اړتيا ده چې هرڅه بېرته عادي حالت ته وګرځي.