کندهار (پژواک، ۷ وږی ۱۴۰۰): د کندهار د اطلاعاتو او فرهنګ ریاست په یوه تازه ګام کې په دغه ولایت کې له راډیوګانو او تلوېزیونونو د موسیقي او ښځینه غږونو پر خپرولو بندیز ولګاوه.
اړوندو مسوولینو دا پرېکړه د خبریالانو په ګروپونو او خپلو پاڼو کې هم خپره کړې ده.
د کندهار د اطلاعاتو او فرهنګ ریاست د اطلاعاتو آمر مولوي رحمت الله نړیوال له ډېرو جزئیاتو ورکولو پرته وویل چې دا پرېکړه د یاد شوي ریاست له خوا شوې ده.
هغه زیاتوي: «په کندهار کې ټولو محلي رسنیو (راډیوګانو او تلوېزیونونو) ته خبر ورکول کېږي چې موسیقي او هغو پروګرامونو خپرولو ته اجازه نسته چې د ښځو غږ او یا ښځې په یوه نوع ګډون په کې ولري.»
نوموړي د رسنیو له مسوولینو غوښتنه کړې چې له دغسې کړنو ډډه وکړي.
که څه هم تر دې مهاله په کندهار کې د سیمه ییزو رسنیو مسوولینو په دې اړه غبرګون نه دی ښودلی، خو دې پرېکړې اندېښمن کړي دي.
په کندهار کې د ملت غږ راډیو مسوول بسم الله وطندوست پژواک خبري اژانس ته وویل، د ا.ا.ا دا پرېکړه د رسنیو د بندولو په معنى ده.
هغه زیاته کړه، تفریح د انساني ژوند مهمه اړتیا ده، خلک غواړي د خبرونو، دیني او ټولنیزو خپرونو ور ها خوا تفریحي خپرونې هم واوري، خو که په رسنیو کې تفریحي برخه بندېږي نو اورېدونکي به له لاسه ورکړي.
دغه راز ده یادونه وکړه چې سیمه ییزې راډیوګانې په اعلاناتو چلېږي، کله چې یوه راډیو تفریحي برخه و نه لري نو پانګه وال اعلانات هم نه ورکوي.
له تلوېزیونونو او راډیوګانو د ښځینه غږونو د نه خپرولو په تړاو ده وویل چې دغسې یوه پرېکړه د ټولنې د نیمايي برخې د نظرانداز کولو معنى لري.
د ده په خبره، نور به ښځینه خبریالانې په رسینو کې د کار اجازه نه لري او د ټولنې دغه نیمايي قشر به په رسنیو کې خپله استازولي له لاسه ورکوي.
په کندهار کې د یوې بلې سیمه ییزې راډیو مسوول نقیب صدیقي هم پر دې پرېکړه اعتراض لري او وايي، د نړۍ په ټولو هغو اسلامي هېوادونو کې چې شرعي نظام لري، په رسنیو کې يې ښځينه کارکوونکې خپرونې مخ ته وړي او هيڅ ممانعت ورته نشته، نو په افغانستان کې ولې منع کېږي؟
دغه موضوع او په اړه یې د رسنیو د مسوولینو اندېښنې مو په کابل کې د ا.ا.ا. د ویاند ذبیح الله مجاهد سره شریکې کړې، خو تر اوږده انتظار وروسته یې هم په دې اړه معلومات ور نه کړل.
په کندهار کې دا مهال د ملي راډیو تلوېزیون په ګډون درې تلوېزیونونه او ۱۶ سیمه ییزې راډیوګانې فعالیت لري چې تر ډېره د اعلاناتو له لارې خپل لګښتونه پوره کوي.
Views: 1454
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن