شاهین، په ملګرو ملتونو کې د افغانستان د څوکۍ په اړه تازه پرېکړه بې انصافي وبلله

کابل (پژواک، ۱۱ لېندۍ ۱۴۰۰): د ملګرو ملتونو له خوا اوسني حکومت ته د افغانستان څوکۍ نه سپارلو په غبرګون کې دې څوکۍ ته نوماند محمد سهیل شاهین وایي چې دا پرېکړه د اصولو او انصاف پر بنا نه ده او له افغان ولس څخه یې مشروع حق اخیستی دى.

د روان کال د وږي میاشتې په ۳۱مه د افغانستان د بهرنیو چارو وزارت په یوه لیک کې محمد سهیل شاهین په ملګرو ملتونو کې د افغانستان سرپرست استازی ونوماوه.

خو د ملګرو ملتونو یوې ځانګړې کمېټې تېره ورځ پرېکړه وکړه چې په عمومي اسمبله کې دې د افغانستان څوکۍ د اوس لپاره د افغانستان سرپرست حکومت ته نه ورکول کېږي او د افغانستان د تېر حکومت استازی غلام محمد اسحاقزی به د اوس لپاره په ملګرو ملتونو کې د افغانستان استازى وي.

خو سهيل شاهين وايي چې دا پرېکړه یې د اصولو او انصاف پر بنا نه ده؛ ځکه چې له افغان ولس څخه یې مشروع حق اخیستی دى.

ده ویلی: «موږ امید لرو چي په نږدې راتلونکي کې په ملګرو ملتونو کې دا حق د افغانستان د حکومت استازي ته وسپارل شي، څو په لا موثر او ښه ډول د افغانستان د ولس ستونزې حل کړای شو او له نړیوالو سره مثبت تعامل ولرو.»

خو بل لور ته د پخواني حکومت د ولسمشر لومړي مرستیال امرالله صالح د ملګرو ملتونو دا پرېکړه ستایلې ده.

ده په خپله ټويټرپاڼه لیکلي: «په ملګرو ملتونو د افغانستان د استازولۍ څوکۍ د افغانستان اسلامي جمهوریت قانوني استازو ته پاتې کېږي، موږ د اعتبار ورکولو ځانګړې کمېټې دا پرېکړه ستایو، هرکلی یې کوو او دا افغانستان ډېرو زخمونو ټکورولو پر لور يې یو ګام بولو.»

د افغانستان سرپرست حکومت مرستیال ویاند بلال کریمي هم پژواک خبري اژانس ته وویل چې د افغانستان حکومت پر رسمي تعاملاتو باور لري او دا هغه وخت کېدای شي چې د رسمي تعاملاتو باب پرانیستل شي.