کرزی وایي، سرپرست حکومت ته یې د لویې جرګې د جوړېدو پلان سپارلی

کابل (پژواک، ۲۵ لړم ۱۴۰۰): د افغانستان پخوانی ولسمشر حامد کرزی وايي، د افغانستان حکومت ته یې د لویې جرګې د رابللو طرحه سپارلې، تر څو د راتلونکي حکومت د جوړېدو، اساسي قانون او ملي بیرغ په اړه پرېکړې وکړي.

حامد کرزي له اسوشیټېډ پرېس اژانس سره په مرکه کې ویلي چې د افغانستان نوي سرپرست حکومت ته یې له بحرانه د وتلو لپاره یو پلان سپارلی چې په کې د لویې جرګې رابلل او په موقتي ډول د پخواني پاچا محمد ظاهر شاه د وخت اساسي قانون پلي کول شامل دي.

د ده په وینا، لویه جرګه به د راتلونکي حکومت د جوړېدو، اساسي قانون او ملي بیرغ په اړه پرېکړې کوي.

دغه راز هغه ویلي چې طالبانو کابل په زور نه دی نیولی، بلکې ده ورته بلنه ورکړې چې ښار ته ننوځي.

هغه وایي، وروسته له هغې چې پخوانی ولسمشر غني ناببره او په پټه له افغانستانه ووت، ده طالبانو ته چې د کابل ښار تر دروازو پورې رسېدلي و، بلنه ورکړه تر څو کابل ته ننوځي او د ګډوډیو مخه ونیول شي.

کرزی وايي، که اشرف غني په کابل کې پاتې وای، نو د یوه جوړ جاړي له مخې به سوله ییز انتقال تر سره شوی و.