کابل (پژواک، ۱۸ وری ۱۴۰۱): په کابل کې د خصوصي ښوونځيو اتحادیې مسوولین وايي، په هېواد کې له بدلون وروسته نه یوازې ۲۰۰ ښوونځي د اقتصادي ستونزو له امله تړل شوي، بلکې ښوونځیو ته د نجونو پر تګ له بندیز وروسته ۳۰ سلنه زده کوونکي هم کم شوي دي.
دا څرګندونې په کابل کې د خصوصي ښوونځيو اتحادیې رییس محمد عظیم میدانوال له پژواک خبري اژانس سره په مرکه کې وکړې.
هغه وویل، په هېواد کې وروستي بدلون د ژوندانه د نورو چارو ترڅنګ د خصوصي ښوونځیو چارې هم اغېزمنې کړې.
ده زیاته کړه، د هېوادوالو له وتلو او د اقتصادي وضعیت له لوېدو سره ګڼو کورنیو خپل اولادونه له خصوصي ښوونځیو ایستلي او په ټوله کې د تېر په پرتله د زده کوونکو شمېر کم شوی دی.
دی وايي: ((په ټول هېواد کې ۳زره خصوصي ښوونځي شته چې ۱۲۰۰ یې یوازې په کابل کې دي، په دغو ټولو ښوونځیو کې ۷۵۰ زره زده کوونکي په زده کړو بوخت دي.))
خو د ده په خبره، په هېواد کې له بدلون وروسته نه یوازې ۲۰۰ ښوونځي د اقتصادي ستونزو له امله تړل شوي، بلکې ښوونځیو ته د نجونو پر تګ له بندیز وروسته ۳۰ سلنه زده کوونکي هم کم شوي دي.
میدانوال وویل: “هغه ښوونځي چې لیسې وې، ډېرو یې دوه- دوه څانګې لرلې، یوه د هلکانو او بله د نجونو، چې د حکومت له خوا ښوونځیو ته د نجونو پر تګ له بندیز وروسته د نجونو ودانۍ خالي شوې.”
د ده په خبره، د خصوصي ښوونځیو په وسیله نه یوازې لسګونو زره زده کوونکو ته د زده کړو زمینه برابره شوې، بلکې ۱۵۰زره کسان هم په مستقیم او نامستقیم ډول په کې پر دندو بوخت دي.
هغه دا هم وویل چې په خصوصي ښوونځيو کې له ۷۰ تر ۸۰ زره ښوونکي په کار بوخت دي چې ۵۰ زره یې یوازې ښځې دي.
نوموړی خپګان وښود چې یو ځل د کرونا له امله د دوو کلونو لپاره د ښوونځیو دروازې وتړل شوې او اوس بیا دغه وضعیت دوی زیانمن کړي دي.
دغه راز یې د مالیې ورکړې په برخه کې هم له ستونزو شکایت وکړ چې هم یې له مخکني او هم اوسني نظام سره خپلې ستونزې شریکې کړې خو حل شوې نه دي.
دی وايي، دولت په داسې حال کې له دوی مالیه اخلي چې د زده کړې په برخه کې یې د هغوی له اوږو لوی بوج کم کړی دی، په داسې حال کې چې په نوره نړۍ کې په خصوصي سکتور مالیه نشته.
د ده په خبره، په دولتي ښوونځیو کې په یوه زده کوونکي ۱۰۷ ډالر لګښت راځي، خصوصي سکتور دا لګښت له دوی کم کړی خو بیا هم مالیه ورڅخه اخیستل کېږي.
نوموړی زیاتوي، خصوصي سکتور له ۱۰۰ میلیونه ډېره مالیه دولت ته ورکوي خو که د خصوصي سکتور د بحران مخنیوی و نه شي نو دا علمي بنسټونه به وتړل شي او دولت ته به هم دروند زیان واوړي.
اسلام الدین یارمل له هغو کسانو دی چې په کابل ښار کې خصوصي ښوونځی لري، دی وايي، په هېواد کې له بدلون وروسته یې د ښوونځي ۴۰ سلنه زده کوونکي کم شوي دي.
د هغه په خبره، که څه هم دوی له زده کوونکو کم میاشتنی فیس اخیست خو بیا هم د کورنیو اقتصاد دومره لوېدلی چې همدا کم فیس هم نه شي تادیه کولای.
دی وايي، د کابل ښار په دولمسه حوزه کې ۱۳۷ خصوصي ښوونځي موجود وو چې له ډلې یې ۴۵ تړل شوي دي.
نوموړی زیاتوي چې د حکومت له لوري له شپږم ټولګي پورته ښوونځيو ته د نجونو تګ په بندیز سره هم د دوی په زده کوونکو کې کموالی راغلی دی.
هغه له حکومته غوښتنه وکړه چې خصوصي ښوونځیو ته دې پاملرنه وکړي او د دوی ستونزې دې حل کړي.
بلخوا د پوهنې وزارت ویاند عزیزاحمد ریان پژواک ته وویل، حکومت هڅه کوي د خصوصي ښوونځيو د ستونزو د حل لارې چارې ولټوي.
د ده په خبره، د پوهنې وزارت مسوولینو هر وخت د خصوصي ښوونځيو له مسوولینو سره ناستې کړې او د دوی ستونزې یې اورېدلې چې امکاناتو ته په کتو رسېدنه ورته کېږي.
هغه د یوې پوښتنې په ځواب کې وویل چې له شپږم ټولګي پورته د نجونو پر مخ د ښوونځيو پرانیستل د مشرانو کار دی، هر وخت چې هغوی امر وکړي، د پوهنې وزارت به ياد ټولګي پرانیزي.
Views: 114
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن