د کډوالو په چارو کې د ملګرو ملتونو عالي کمېشنرۍ د افغان ښځو پر وضعیت اندېښنه ښودلې

کابل (پژواک، ۲۵ وری ۱۴۰۱): د کډوالو په چارو کې د ملګرو ملتونو سازمان عالي کمېشنرۍ یو ځل بیا په افغانستان کې د ښځو او نجونو د وضعیت په اړه اندېښنه څرګنده کړې او ویلي یې دي چې دغه هېواد نه شي کولای ښځې او نجونې له پامه وغورځوي.

د کډوالو په چارو کې د ملګرو ملتونو سازمان عالي کمېسارۍ (UNHCR) تېره چهارشنبې په یوه ټویټ کې ویلي، د افغانستان خلک له بې ساري بحران سره مخ دي، تر ټولو ډېر زیان ښځې او نجونې ویني.

دغه بنسټ ټینګار کړی چې د ښځو او نجونو حقونه باید وساتل شي.

دغه سازمان ویلي: ((پر نورو عواملو سربېره وچکالي، اقتصادي بحران، د خوړو نه خوندیتوب، کووید ــ۱۹، ښځې او نجونې د تګ راتګ او زده کړو ته د لاسرسي په برخو کې له محدودیتونو سره مخ دي.))

د یاد بنسټ په خبره، افغانستان نه شي کولای ښځې او نجونې له پامه وغورځوي.

دغه بنسټ زیاته کړې چې په افغانستان کې اوس مهال ښځو او نجونو د انساني بحران سختۍ پر ځان منلې دي.

په ورته وخت کې افغانستان کې د کډوالو په چارو کې د ملګرو ملتونو د عالي کمېشنرۍ دفتر تېره ورځ کندهار ولایت کې د مرستیال والي او نورو سیمه ییزو چارواکو په موجودیت کې د نجونو یو مکتب پرانیستی دی.