د فوټبال اسیا جام غوراوي سیالیو کې افغانستان نن له هندوستان سره لوبه کوي

کابل (پژواک، ۲۱ غبرګولی ۱۴۰۱): د فوټبال اسیایي جام ته د لار موندنې په موخه د افغانستان او هندوستان ترمنځ نن لوبه ترسره کېږي.

د افغانستان فوټبال فدراسیون وایي، دا لوبه نن د شنبې په ورځ د هندوستان په کلکته ښار کې د افغانستان په وخت ماښام اووه نیمې بجې پیلېږي.

دا د ۲۰۲۳ زېږدیز کال اسیايي جام سیالیو ته د غوراوي پړاو لوبې دي.

د افغانستان د فوټبال ملي لوبډلې لوبډلمشر فرشاد نور تر لوبې مخکې په یوه خبري کنفرانس کې وویل چې افغان لوبغاړي هند ته د لوبې ګټلو لپاره ورغلي دي.

ده زیاته کړه: «موږ هند ته درناوی لرو، خو موږ دلته د بریا لپاره راغلي یو، نه پوهېږو چې څومره ګولونه به ووهو، خو باید دا لوبه وګټو.»

هغه زیاته کړه، د دې سیالیو لومړۍ لوبه یې بایللې او دا لوبه باید وګټي.

فرشاد وویل چې په لومړۍ لوبه کې ترې ځینې تېروتنې شوې چې باید بیا یې تکرار نه کړي.

د یادونې ده، په لومړۍ لوبه کې د هانګ کانګ لوبډلې افغانستان ته دوه پر یو ګول ماتې ورکړې وه.

د افغانستان د فوټبال ملي لوبډلې سر روزونکي انوش دستګیر وویل چې هند سره د سیالۍ لپاره بشپړ چمتووالی نیولی دی .

هغه زیاته کړه، د هند او کمبودیا ترمنځ پرونۍ لوبه یې لیدلې او د هغوي کمزورۍ یې په ګوته کړې دي.

نوموړي تیرې لوبې ته په اشارې سره وویل چې له لوبغاړو ځینې تېروتنې وشوې، خو هغه لوبه تېره شوه او دوی راتلونکي لپاره چمتو دي.