پلعلم (پژواک، ۲۵ غبرګولی ۱۴۰۱): د لوګر د پوهنې ریاست وایي، د دغه ولایت د برهکي برک ولسوالۍ اړوند د زړې کلا لیسې ښوونکو او زدهکوونکو په خپل شخصي لګښت، ۵ درسي ټولګي جوړ کړي دي.
د یاد ولایت د پوهنې ریاست ویاند شاهپور عرب پژواک خبري اژانس ته وویل، د دغو درسي ټولګیو پر جوړولو شاوخوا ۳۵۰زره افغانۍ لګښت شوی چې د ښوونکو او زدهکوونکو کورنیو په خپله خوښه ورکړې دي.
هغه زیاته کړه، له دې مخکې د یادې شوې لیسې نږدې ۲۵۰ زدهکوونکو په شلېدلو خېمو کې زدهکړې کولې؛ خو د دغو ۵ درسي ټولګیو په جوړېدو به اوس په مناسب چاپېریال کې زده کړې کوي.
نوموړی وايي، د پوهنې ریاست د برهکي برک ولسوالۍ د خلکو دغه کار ستايي او د لوګر پر سوداګرو او نورو مشرانو غږ کوي چې په خپلو ولسوالیو او کلیو کې هغو ښوونځیو ته ودانۍ جوړې کړي چې زدهکوونکي یې ټولګي نه لري او په ازاده فضا کې درس وایي.
د لوګر اوسېدونکي هم د برهکي برک ولسوالۍ د زړې کلا لېسې زدهکوونکي او ښوونکي ستايي چې په شخصي لګښت یې ۵ درسي خونې جوړې کړې دي.
د برهکي برک یوه اوسېدونکي برات خان پژواک ته وویل، دغه کلتور باید د لوګر ټولو ولسوالیو او کلیو ته وغځول شي او په ورته ټولګټو چارو کې دې ټول تر خپلې وسې ونډه اخلي.
هغه زیاته کړه، همدا اوس د دغه ولایت په ډېرو ولسوالیو کې ښوونځي ودانۍ نه لري او شاګردان یې په ازاده فضا کې پر زدهکړو بوخت دي.
نوموړي له پوهنې وزارته هم غوښتنه وکړه چې د تېر نظام د ښوونځيو د ودانیو جوړولو طرحه عملي کړي او د هغو ښوونځیو د ودانیو جوړولو پاتې کارونه دې بشپړ کړي چې هماغه مهال پیل شوي وو.
په لوګر کې له دې مخکې هم ځينو خېريه بنسټونو او په خپله خلکو ښوونځيو ته درسي ټولګي جوړ کړي او هم يې له ښوونځيو او زدهکوونکو سره اړينې مرستې کړې دي.
GET IN TOUCH
NEWSLETTER
SUGGEST A STORY
PAJHWOK MOBILE APP