تېرو څلورو میاشتو کې تر ۲۰زره ډېر سیلانیانو له بدخشانه لیدنه کړې

فیض‌اباد (پژواک، ۳۱ چنګاښ ۱۴۰۱): د بدخشان سیمه‌ییزې سرچینې په دغه ولایت کې د ګرځندوی صنعت د بیا غوړېدو خبر ورکوي او وایي، په تېرو څلورو میاشتو کې له ۲۰زرو ډېرو داخلي او بهرنیو سیلانیانو د دغه ولایت له تاریخي سیمو څخه لیدنه کړې ده.

د بدخشان د اطلاعاتو او کلتور ریاست د ګرځندوی امر صدیق لعل‌زاد پژواک خبري اژانس ته وویل، د کرونا ویروس له خپرېدو او د تېر کال د زمري په ٢٤مه د سیاسي نظام له پرځېدو وروسته، په دغه ولايت کې د ګرځندويانو شمېر کم شوى وو.

هغه زیاته کړه: «له نېکه‌مرغه په روان کال کې لسګونه بهرني سیلانیان چې د چین، ایران، ترکیې او امریکا هېوادونو وګړي وو، د دغه ولایت له ښکلو ځایونو لیدنه کړې چې دا د دغه ولايت د ګرځندوی صنعت د ودې او پرمختګ ښکارندويي کوي.»

سرچینې زیاته کړه، د ځايي او محلي توکو د پېرلو، د هوټل د خدماتو د عرضه کېدو او نورو لګښتونو له پلوه، په منځني ډول د هر بهرني سیلاني منځنی لګښت  ۳زره ډالر کېږي چې په غېر مستقیم ډول د ځایي اوسېدونکو جیبونو ته ځي، همدارنګه د شرکتونو د جواز له درکه یوه اندازه نورې پیسې د افغان‌ټور دولتي شرکت له لارې د دولت خزانې ته ځي.

هغه زیاتوي: «خو په تفریحي ځایونو او نور د لیدلو وړ سیمو کې د کارکونکو د تشکیلاتو د کموالي له امله و نه توانېدو چې د بهرنیو سیلانیانو دقیق شمېر ولرو.»

نوموړی زیاتوي، د هغو ارزونو له مخې چې دوی په روان کال کې یې درلودې، له ټول هېواده نږدې ۲۰زرو سیلانیانو د دغه ولایت اړوند د شهدا ولسوالۍ حوض شیوه، چشمه یاسیج او غارسپان ته، د وردوج ولسوالۍ ابشار یخشیره، د وا خان ولسوالۍ قلع نوشاخ او ملي پارک او په جرم ولسوالۍ کې ځینې د لیدو وړ ځایونو او دغه راز د زیباک او بهارک په ګډون د بدخشان نورو سیمو ته سفر کړی دی.

هغه په بدخشان کې پر سياحتي سیمو سربېره، په دغه ولايت کې د پاکې او سوتره هوا او د نادرو ژویو شتون هم د سيلانيانو د زياتوالي يو لامل ګڼي.

هغه زیاتوي، اوسهمال د بدخشان په کچه او لویو لارو کې هېڅ ډول امنیتي ګواښونه نشته او  کورني او بهرني سیلانیان کولای شي چې په ارام فکر او له کومې اندېښنې پرته نوشاخ قلې او د واخان ولسوالۍ دویم ملي پارک لیدو ته ولاړ شي او یا هم د دغه ولایت د نورو سیمو له لیدو خوند واخلي او له خوږو خاطرو یوه ډکه دنیا دې ځان سره ولري.

په همدې حال کې د کابل ولایت اوسېدونکی احمدفهیم چې له ملګرو سره یو ځای د بدخشان د تاریخي سیمو، ښکلي طبیعت او پاکې هوا د تنفس لپاره دغه ولایت ته راغلی، وایي: «درې ورځې کېږي چې له ملګرو سره یو ځای مو له شیوه حوض، غارسپان او د شهدا ولسوالۍ د یاسیچ چینې څخه لیدنه وکړه او هلته مو له ملګرو سره شپې تېرې کړې.»

هغه زیاتوي، په تېرو کلونو کې یې د بدخشان او د افغانستان د نورو برخو د لیدو هیله درلوده، خو د نا امنیو او د کرونا ویروس د خپرېدو له امله نه وو توانیدلي چې دغو سیمو ته ولاړ شي.

نوموړی له نورو کورنیو او بهرنیو سیلانیانو غواړي چې د نالیدلو ځایونو لرونکو ولایتونو ته سفر وکړي او له جذبونکو منظرو یې خوند واخلي؛ ځکه چې د سفر پر مهال هیڅ ډول مزاحمت او اندېښنې نه احساسيږي.