کندهار (پژواک، ۳۱ زمری ۱۴۰۱): د کندهار چارواکي وايي، د ډیورنډ کرښې په هغې غاړې کې د اوبو یوه بند د ماتېدو له امله د دغه ولایت په ښورابک ولسوالۍ کې یو کلی اوبو لاندې کړی دی.
د کندهار د والي ویاند حاجي زید پژواک خبري اژانس ته وویل، د اوبو دغه بند ښورابک ولسوالۍ ته څېرمه د ډیورنډ کرښې په هغې غاړه کې دی چې تېره ورځ د سخت اورښت له امله مات شوی دی.
هغه زیاته کړه، د یاد بند اوبه د ښورابک ولسوالۍ د «بدرزو» پر کلي ورغلې او یو مخ یې له منځه وړی دی.
دی وايي، د دغه کلي لسګونه کورونه او کلینک ټول ویجاړ شوي خو اوسېدونکي یې ژغورل شوي دي.
د نوموړي په خبره، امنیتي کسانو د مرستې په موخه یادې سیمې ته د تلو هڅه کړې، خو لار بنده ده او د اوس لپاره ورته رسېدنه نه شي کولای.
هغه زیاتوي چې لاره خلاصه شي نو د اوښتي زیان کچه به معلومه کړي او له زیانمنو سره به مرستې وشي.
د ښورابک اوسېدونکي هم وايي، سېلاب د خلکو کورونه ویجاړ کړي او د هغو شته یې وړي چې اوس بېړنیو مرستو ته اړتیا لري.
د دغې ولسوالۍ یوه اوسېدونکي سیدګل پژواک خبري اژانس ته وویل، تېره ورځ د ښورابک د بدرزو کلی اوبو لاندې کړ او د خلکو کورونه یې ویجاړ کړل.
دی وايي، ډېری خلک خوندي ځایونو ته تللي، خو د خوراک او سرپناه لپاره څه نه لري، حکومت او مرستندویه ادارو ته په کار ده چې په بېړنۍ توګه مرستې ور ورسوي.
وروستیو اورښتونو او سېلاوبونو د کندهار ښار په ګډون په ميانشين، شاولیکوټ، معروف، ارغستان، ارغنداب، سپين بولدک، ښورابک او تختهپل ولسواليو کې خلکو ته په میلیونونو افغانیو مالي زیانونه اړولي دي.
د کندهار ولایت مقام د معلوماتو له مخې، سېلابونو په یادو شوو ولسوالیو کې ۲۰۰ کورونه نړولي او ۱۵۰ باغونه ویجاړ کړي دي.
چارواکي وايي، تر اوسه هیڅ یوې مرستندویه ادارې د دغه ولایت له سېلابځپلو سره مرسته نه ده کړې.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن