[restrict paid=”true”]
کابل (پژواک، ۳۱ زمری ۱۴۰۱): د هرات د کار او ټولنيزو چارو رييس وايي، په دغه ولايت کې د تېرو دوو کلونو په پرتله د سوالګرو شمېر ٣٠ سلنه زيات شوى او دا مهال په هرات ښار کې ١٥زره سوالګر موجود دي.
بلخوا د کار او ټولنيزو چارو رياست مسوولین په دغه ولايت کې د سوالګرو د راټولولو په موخه د يوې کمېټې له جوړېدو خبر ورکوي.
د هرات ولايت د کار او ټولنيزو چارو رييس حافظ ميرزامحمد منصور وايي، په دغه ولايت کې د تېرو دوو کلونو په پرتله د سوالګرو شمېر ٣٠ سلنه لوړ شوى او اوس مهال په هرات ښار کې ١٥زره سوالګر شته دي.
هغه زیاتوي چې له یادو سوالګرو یوازې ۱۵۰۰ کسان یې لویان او پاتې نور یې په کوڅو او واټونو ګرځېدونکي ماشومان دي.
دغهراز د هرات د کار او ټولنيزو چارو ریاست د تامیناتو عمومي مدير محمدنعيم صابر هم وايي، د سوالګرو د زياتوالي له امله يې رياست د هرات ولايت له سيمهييزې ادارې سره په همغږۍ توانېدلی چې د سوالګرو د راټولولو لپاره يوه کمېټه جوړه کړي.
هغه وويل: «دغه کمېټه به ډېر ژر د ولایت د مقام، ښاروالۍ او مرستندويه موسسو په ملاتړ خپل کار پيل کړي او موږ به په عملي بڼه په ښار کې د بدلونونو شاهدان واوسو.»
په ورته مهال په هرات کې د سوالګرو زیاتوالي د خلکو اندېښنې هم راپارولي دي.
د هرات ولايت اوسېدونکې ٣٨ کلنې زرمينې پژواک ته وويل: «هر کله چې د هرات په ښار کې قدم وهې، نو له بېلابېلو سوالګر سره په مختلفو عمرونو او مختلف وضعیت مخ کېږې، په هرات ښار کې د سوالګرو شمېر دومره ډېر شوی چې ښایي په هرو څو قدمونو کې له درېیو یا څلورو کسانو سره مخ کېږو او پیسې غواړي.»
هغه له حکومته غواړي مخکې له دې چې دغه سوالګر د ټولنې د اوږو بار شي، د راټولولو لپاره يې يو مشخص پلان جوړ کړي.
په دغه ولايت کې لاسي پلورونکي رحيم يوسفي چې بسکوېټ او کيک پلوري، پژواک ته یې وویل: «د سوالګرو شتون ډېرې ستونزې راته پیدا کړې، ځکه ډېرى مهال زما هغه وسایل چې له پیاده رو سره یې ږدم، د دوی له لوري غلا کېږي.»
رحیم هم له حکومته غواړي چې دغه کسان له ښاره ټول کړي.
بلخوا په هرات کې يوې سوالګرې فېروزې چې له سهاره تر ماښامه له خپل خاوند او دوو ماشومانو سره د مهري لېسې سړک ترڅنګ تېروي او په څېره کې یې د بېوزلۍ نښې له ورایه ښکاري، پژواک ته یې وویل: «له مجبورۍ او ناچارۍ مو په سوالګرۍ لاس پورې کړی.»
فیروزې زیاته کړه، مخکې یې له خپل خاوند سره ښه ژوند درلود؛ خو اوس ان د خوړلو لپاره ډوډۍ هم نه لري او په ښار کې د کار زمینه هم برابره نه ده.
هغه په داسې حال کې چې د هرات په ۳۹ درجې ګرمۍ کې په پیادهرو کې ناسته ده وايي، سوال کول یې د ژوندي پاتې کېدو یوازینۍ لار ده او زیاتوي چې د ژوند د چارو پر مخ وړلو لپاره له دې لارې پرته بله چاره نه لري.
د هغې په وینا، له سوالګرۍ هم هیڅ شی نه ترلاسه کېږي، له سهاره تر غرمې توانېدلې څو یوازې ۱۰ افغانۍ ترلاسه کړي.
په همدې حال کې، لس کلن باسط په داسې حال کې چې له خپلې ۱۲ کلنې خور سره سوالګري کوي، د خپلو اقتصادي ستونزو څرګندولو ترڅنګ یې زياته کړه چې له حکومته غواړي څو له دوى سره مرسته وکړي او يا هم د کار زمينه ورته برابره کړي.
دا په داسې حال کې ده چې سوالګر وايي، که د کار زمینه ورته برابره شي، هېڅکله به سوال ونه کړي.
بلخوا د ټولنيزو چارو يو شمېر کارپوهان هم د ښار په کچه د سوالګرو د زياتوالي په اړه اندېښمن دي او وایي چې د سوالګرو زياتوالى ټولنې ته هم زيان رسوي.
د ټولنيزو چارو کارپوه قدوس خطيبي وايي، په دغو سوالګرو کې تر ټولو ډېر قربانيان ځوانې ښځې او ماشومان دي چې ښايي له بېلابېلو لارو ترې ناوړه ګټه اخیستل کېږي.
خطيبي يادونه وکړه: «دا يو ټولنيز ناورین دی چې د ټولنې په کچه يې د حل لپاره دوه لارې شته؛ په لومړي قدم باید له ټولنې د سوالګرۍ فرهنګ له منځه یوسو چې کار به د وخت په تېرېدو سره وشي او دغه راز د بېوزلۍ له منځه وړل، دا مهال خلک د بېوزلۍ له امله سوالګرۍ ته مخ کوي.»
د يادونې ده چې څه موده وړاندې د ریاست الوزراء اقتصادي مرستیال اعلان وکړ چې د يو شمېر نورو بنسټونو په همکارۍ يې له کابل ښاره د سوالګرو د راټولولو لړۍ پيل کړې ده.
[/restrict]
Views: 17
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن