[restrict paid=”true”]
کابل (پژواک، ۲۰ وږی ۱۴۰۱): ځیني چارواکي او شنونکي د نجونو پر مخ تر شپږم پورته ټولګي د ښوونځیو پرانیستې غوښتنه کوي، په دې برخه کې ځنډ د اسلامي امارت لپاره «مصلحت» نه بولي او وایي چې دغه مسئله دې ژر حل شي.
ځیني کسان دا هم وایي چې افغاني کلتور له زدهکړو سره مخالفت نه دی او که چېرې ښوونځیو ته د نجونو د تګ لپاره د ميکانيزم په جوړولو کې ستونزه وي، نو له ولس څخه دې مرسته وغوښتل شي.
دغهراز د بشري حقونو د څار بنسټ د ملګرو ملتونو د بشري حقونو له شورا غوښتي چې د افغانستان سرپرست حکومت دې د نجونو د زدهکړو په برخه کې مسؤولانه چلند ته اړ کړي.
د روان کال د وري میاشتې په لومړیو کې ښوونیز کال پیل شو؛ د افغانستان سرپرست حکومت په هماغه ورځ د نجونو د منځنیو ښوونځیو او لېسو پیل وځنډاوه او ویې ویل، په دې اړه پر یوې طرحې کار روان دی چې له بشپړېدو وروسته به یې دا ښوونځي پرانیستل شي، خو تراوسه دغه کار نه دی شوی.
خو ځېنو سرچینو د وږې په ۱۴مه وویل چې په پکتیا کې د ښوونځيو د مديرانو او خلکو له ډېر ټينګار وروسته د نجونو له شپږم ټولګي پورته ښوونځي پرانېستل شول. ګڼو خلکو دغه اقدام وستایه او له حکومته یې غوښتنه وکړه چې په ټولو ولایتونو کې دې ښوونځي د نجونو پر مخ پرانیزي.
یوه ورځ وروسته (د وږي په ۱۵مه) د اسلامي امارت وياند ذبيحالله مجاهد کابل کې خبريالانو ته وویل، دا چې دغه ښوونځي په کومو شرايطو او د چا په امر پرانیستل شوي، تر اوسه معلومه نه ده او پر موضوع څېړنې کېږي؛ خو تېره ورځ (د وږي ۱۹مه) په ټولنیزو رسنیو کې داسې انځورونه او وېډیوګانې لاس په لاس شوې چې ګواکې یاد ښوونځي تړل شوي او په پکتیا کې یو شمېر نجونو د ښوونځیو د بېرته تړل کېدو په غبرګون کې لاریون کړی دی.
https://www.facebook.com/watch/?v=1707903922919469
رسمي سرچینو تر اوسه په دې اړه څه نه دي ویلي؛ خو د بشري حقونو د څار بنسټ، ځینو چارواکو، شنونکو او نورو افغانانو په تړاو یې غبرګونونه ښودلي دي.
«د نجونو ښوونځیو د پیل ځنډول د امارت په مصلحت نه دي»
د اوبو او برېښنا وزارت سلاکار ډاکټر فاروق اعظم تېره ورځ په خپلې فېسبوکپاڼې کې لیکلي چې د نجونو پر مخ بايد د علم دروازی ژر خلاصې شي.
ده زیاته کړې: «يو کال تېر شو، شرعي تدابير به حتماً ورته نيول شوي وي. دا ځکه کال کافي وخت دی. نور يی ځنډول قطعاً د امارت په مصلحت نه دی. که موږ غواړو د پردو له احتياجه خلاص سو، زموږ نر او ښځه بايد ضروري علوم حاصل کړي. يو شمېر خلک اوس وطن د اولاد د تعليم لپاره پريږدی. دغسې تغريب ته حالات برابرول شرعا ناجائز دي.»
د افغانستان د بدني روزنې او ورزش عمومي ریاست سرپرست او د المپیک ملي کمېټې مشر نظرمحمد مطمین ویلي: «چې يو مخ نه بنديږي او نه هم يو مخ خلاصيږي، تر کومه وخته به دا حال وي؟»
د ده په وینا، د نجونو ژړا، د کورنيو او بهرنيو رسنيو د سر ټکي، له هېواده د خلکو وتل، د ښوونځيو د نجونو لاريون او هوايې ډزې، دغه ټول مسایل اساسي او سم حل غواړي.
جنرال مبین خان – چې په نوي سرپرست حکومت کې د یو څه وخت لپاره د کابل د امنیه قوماندانۍ ویاند و – لیکلي: «مشرانو! مکاتب خلاص کړئ.»
ده تر دغه هیشټګ لاندې لیکلي: «پکتیا کې له شپږم ټولګي پورته د نجونو ښوونځي بېرته وتړل شو، یو پوسټ مې لږ مخکې اوکړو اخطار یې راکړو، اخر ولې، مجبور یم د حق ویلو لپاره خپله زولنې ځان ته واخلم او زندان ته لاړ شم.»
د هغه په وینا، مشرانو پخوا ویلې چې د ولس هره هغه خبره چې له شريعت سره په ټکر کې نه وي مني یې، خو اوس چې اقتدار ته رسېدلي نو د ولس پر «مشروع غوښتنو يي خاشه» اچولې ده.
یاد هشټګ ګڼ شمېر کسانو پر خواله رسنیو کارولی او ترې لاندې یې له حکومته غوښتنه کړې چې ښوونځي پرانیزي.
د سیاسي چارو شنونکي استاد همت توریالي ویلي چې خلک ښوونځیو ته د نجونو د نه تګ له امله ناهيلي شوي او ممکن يوه ورځ د «زور اقدام» وکړي.
دی وايي: «د خلکو زور له خدای نه وروسته دوهم زور ده چې مسوول به امارت وي!»
عقاب افغان الحنفي په نوم بل کس لیکي چې د ښوونځیو بندېدو د رسنیو د تبلیغاتو ماشین تود کړی خو دوی نه پوهېږي چې ولې دغه حالت روان دی.
دی وايي: «کله چې له همدغې پوښتنې سره مخامخ شو، متاسفانه چې ضعیف توجیهات ورته لټوو… له مشرتابه هیله کوم چې دغه جنجالي موضوع یو طرفه کړي، یا دې هم د تل لپاره بند او یا د خلاصون امر ورکړي.»
د یادونې ده چې د پوهنې وزير نورالله منيب تېره میاشت (د زمري ۱۷مه) خوست ته د خپل سفر پر مهال ویلي و چې «کلتوري محدویتونه» د نجونو ښوونځیو پرانیستو پر وړاندې لوی خنډ دی او تر اوسه پورې د ښوونځیو د بېرته پرانیستلو طرحه بشپړه شوې نه ده.
خو د پخواني ولسمشر حامد کرزي د دفتر رییس عبدالکریم خرم نن پر خپلې ټوېټرپاڼې لیکلي: «له څه باندې ۴۰ کلونو راهیسې مې وطن کې ډېر داسې معصوم حرکتونه ولیدل. دې وروستي یې ددغو نجونو په ماشومانه ژبه او عمل وښودله چې کلتور مو د تعلیم سره مخالفت نه لري، بلکه برعکس.»
لیکوال اساما جوهري په خپلې فسبوکپاڼې کې لیکلي چې د نجونو ښوونځي تر دې حده ځنډول د حيرانتيا خبر ده، که چېرې ميکانيزم جوړولو کې ستونزه وي نو له عام ولس څخه دې مرسته وغواړي.
دی وايي: «د حکومت او عوامو بايد يوه ډېره ژوره عاطفي اړيکه وي، دا د نسلونو راهيسې کړيدلی ولس دی، دوی ته لږ د عطف لاس ورکړئ دوی در غاړې وځي.»
د ده په اند، حکومت ته په کار ده چې خلک خپل کړي، ځکه د خولې مړۍ یې ورسره شریکه کړې ده.
«د م.م د بشري حقونو شورا دې طالبان د نجونو د زدهکړو برخه کې مسؤلانه چلند ته اړ کړي»
د ښځو حقونو په چارو کې د بشري حقونو د څار بنسټ مرستیالې هېدربار تېره ورځ پر خپلې ټوېټرپاڼې لیکلي، طالبان داسې مهال پکتیا کې د نجونو ښوونځي – چې د خلکو په غوښتنه پرانیستل شوي وو – بېرته تړي چې راتلونکې اونۍ د ملګرو ملتونو د بشري حقونو شورا غونډه جوړېږي.
دې له یادې شورا غوښتنه کړې چې د نجونو د زدهکړو په برخه کې جدي ګامونه واخلي او د افغانستان سرپرست حکومت مسؤولانه چلند ته اړ کړي.
[/restrict]
Views: 319
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن