کابل (پژواک، ۳ تله ۱۴۰۱): د ټاپي ګازو نللیکې کمپنۍ اجرائیه رییس وایي، په نږدې راتلونکي کې به د دولتونو په کچه د ټاپي پروژې د رهبرۍ کمېټې غونډه په عشق اباد کې جوړه شي.
دغه څرګندونې په هغې خبرپاڼې کې شوې چې د تلې په درېيمه د ریاست الوزراء د اقتصادي معاونیت له لوري رسنيو ته استول شوې ده.
سرچینه زیاتوي چې د ریاستالوزراء اقتصادي مرستیال ملا عبدالغني برادر نن په کابل کې د ټاپي ګازو نللیکې کمپنۍ له اجراییوي رییس محمدمراد امانوف او د افغانستان لپاره د ترکمنستان سفیر سره د ټاپي پروژې د عملي چارو د بهیر پر پیلولو هر اړخیزې خبرې کړې دي.
سرچينه وايي، په دې لیدنه کې ملا برادر ویلي چې اسلامي امارت د ټاپي پروژې د پيل لپاره پوره چمتووالی لري او په دغه برخه کې هر ډول همکارۍ ته تیار دی.
سرچینه زياتوي چې په دې ناسته کې د ټاپي ګازو نللیکې کمپنۍ اجراییوي رییس وویل چې په نږدې راتلونکي کې به د دولتونو په کچه د ټاپي پروژې د رهبرۍ کمېټې غونډه په عشقاباد کې ترسره شي.
د یادونې ده، د ټاپي پروژې تخنيکي چارې په ۲۰۱۵ زېږدیز کال کې پیل شوې خو د ګازو د لېږد عملي کارونه تر اوسه نه دي پيل شوي.
Views: 110
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن