کابل (پژواک، ۶مرغومی ۱۴۰۱): د کابل والي نن په کابل کې پر هېواد د پخواني شوروي اتحاد د یرغل ۴۳مې کلیزې په مناسبت جوړه شوې غونډه کې وویل، مجاهدینو د شورویانو یرغل مات کړ خو د اسلامي نظام په ټینګولو کې پاتې راغلل.
د کابل سرپرست والي شیخ محمدقاسم خالد وویل: «دا ځانته مسئله ده چې هغه وخت زموږ او ستاسو د جهاد قاعدین د ربالعزت په ابتلا کې واقع شول او په دې ونه توانېدل چې یو اسلامي نظام په دې ملک کې حاکم کړي، خو شوروي یرغل ته يې ماتې ورکړه.»
نوموړي زیاته کړه، که څه هم پخواني شوروي اتحاد د ۱۳۵۸ لمريز کال د مرغومي په ۶مه پر افغانستان پوځي یرغل وکړ خو په وینا يې، هغوی استخباراتي یرغل په ۱۳۵۲ کال کې پيل کړی و.
یادې غونډې ته د کار او ټولنیزو چارو وزارت مرستیال عبدالسلام مخدوم وویل، له یووالي پرته حکومت کول ناشونی دی.
ده وویل: «زه د افغانستان ټول ملت او د اسلامي امارت مسوولینو ته سپارښتنه کوم چې له ملي وحدت پرته حکومت کول ناممکن دي او موږ ټول باید د اسلامي احکامو په رڼا کې یو موټی شو.»
دغهراز، د چارو ادارې مشر نورالحق انور وویل، بهرنیانو تل هڅه کړې چې خپلو موخو ته د رسېدو لپاره د افغانانو ترمنځ تفرقه واچوي.
نوموړي زیاته کړه، هېوادوالو ته په کار ده چې خپل یووالی وساتي او یوازې په یووالي سره دښمن ته ماتې ورکولای شي.
هغه وویل، افغانستان د ټولو ګډ کور دی او باید په ګډه يې اباد کړي.
نوموړي زیاته کړه: «دا د ستونزې حللار نه ده چې هېوادوال بهرنیو هېوادونو ته ځي، بلکې د حللار دا ده چې په خپل هېواد کې پاتې شي او د هېواد په ابادولو کې برخه واخلي.»
د اسلامي امارت ویاند ذبیحالله مجاهد په خپله ټویترپاڼه کې ویلي، په افغانستان کې د پخواني شوروي اتحاد د لښکرو ستره ماته دا پيغام لري چې د نړۍ هیڅ مغرور ځواک د افغانستان مسلمان او غیور ولس پر ایمان، ننګ او پخه اراده شک ونه لري.
GET IN TOUCH
NEWSLETTER
SUGGEST A STORY
PAJHWOK MOBILE APP