کندوز (پژواک، ۲۰ سلواغه ۱۴۰۱): د کندوز د امام صاحب ولسوالۍ د شېرخان بندر ځيني اوسېدونکي وایي، په امو سیند کې په پرلهپسې ډول د اوبو کچې پورته کېدو له امله د دوی کرنیزې ځمکې او کورونه ویجاړ شوي دي.
هغوی زیاتوي، که دې ستونزې ته رسېدنه ونه شي، د امو سیند ترڅنګ ډېر کورونه او کرنیزې ځمکې به له منځه لاړ شي.
له بلې خوا، د کندوز سیمهییز مسوولین د امو سیند پر غاړو د تحکیماتو جوړولو او دې ستونزو ته د رسېدو خبره کوي.
د شېرخان بندر یو استوګن محمد میر -چې د امو سیند پر غاړه اوسېږي- وایي، په وروستیو کلونو کې په پرلهپسې توګه د اوبو پورته کېدو سره د خلکو زرګونه جریب کرنیزې ځمکې اوبو وړې دي.
هغه له سرپرست حکومته غواړي چې د دغه سیند غاړو د تخریباتو مخنیوي لپاره دې استنادي دېوالونه جوړ کړي.
نوموړي وویل: «که په نږدې راتلونکي کې د امو سیند سواحلو د تحکیماتو کار پیل نه شي، د خلکو ډېرې کرنیزې ځمکې او کورونه به د دغه سیند ښکار شي.»
د امو سیند په غاړو کې مېشت خلک وایي، د سیند اوبو د دوامداره پورته کېدو له امله خلکو ته نه یوازې مالي بلکې ځاني زیانونه هم اوښتي دي.
هغوی زیاتوي، که دغه ستونزه هواره نه شي، د یاد سیند د اوبو پورته کېدو له امله به خلک لا ډېر زیانمن شي.
د شېرخان بندر یو بل اوسېدونکی غلام سخي وایي: «په تېرو شپږو میاشتو کې ۱۲۰۰ جریب ځمکه سیند وړې، کورونه او جوماتونه یې وړي، که مخه یې و نه نیول شي پوخ سړک او ګمرک هم وړي.»
له بلې خوا، د امو سیند د تحکیماتو ریاست تخنیکي سلاکار حمیدالله وليزاده وایي: «خپلو ګرانو خلکو ته ډاډ ورکوو چې زموږ د سروې ټیم تللی او د زیانمنونکو ساحو مقدماتي سروې یې ترسره کړې، د اوبو او انرژۍ وزارت سره مو دا ستونزه شریکه کړې، خلکو ته ډاډ ورکوو چې کارونه یې په نږدې وخت کې پیلېږي.»
د یادونې ده، د امو سیند له تاجکستان او ازبکستان سره د افغانستان ګډه سرحدي نقطه ده چې هر کال د اوبو ډېرېدو له امله یې د افغانستان څو ولایتونه زیانمنېږي.
له دې مخکې هم د امو سیند غاړو کې مېشتو خلکو د اوبو پورته کېدو شکایت کړی او د دغه سیند د تحکیماتو غوښتنه یې کړې ده.
Views: 14
GET IN TOUCH
NEWSLETTER
SUGGEST A STORY
PAJHWOK MOBILE APP