کابل (پژواک، ۲۳ سلواغه ۱۴۰۱): د افغانستان مرکزي بانک وایي، د بشري مرستو په دوام د ۴۰ میلیون امریکایي ډالرو بله بسته پرون کابل ته را ورسېده.
دغه بانک نن د سلواغې په ۲۳مه په خپله ټویټرپاڼه کې لیکلي: «افغانستان ته د ۴۰ میلیون ډالرو نغدي بشري مرستې کڅوړه پرون را ورسېده او په کابل کې یو سوداګریز بانک ته و سپارل شوه.»
سرچینې لیکلي، د افغانستان بانک د هر هغه اصولي اقدام چې هېواد ته د اسعارو د راتګ او د ټولنې له اړو کسانو سره د مرستې لامل کېږي، ستاینه کوي او دغه بانک به د بانکي سکتور د لا پیاوړتیا او ټینګښت په برخه کې خپلې هلې ځلې جاري وساتي.
سرچینه زیاتوي، د افغانستان بانک رهبري هېواد ته د نړۍوالې ټولنې د بشري مرستو د هرکلي ترڅنګ هیله لري چې دا مرستې د بانکي سکتور له لارې ترسره شي.
د ۴۰ میلیون ډالرو دا کڅوړه په داسې حال کې کابل ته را استول کېږي چې افغانستان لپاره د ملګرو ملتونو مرستندوی ماموریت (یوناما) د تېرې تلې میاشتې په ۱۲مه ویلي وو، دغه سازمان په تېر یوه کال کې څه باندې یو میلیارد امریکایي ډالر افغانستان ته راوړي، څو له میلیونونو افغانانو سره -چې بشري مرستو ته اړ دي- د ژوند ژغورنې مرستې وشي.
له افغانستان سره په تېرو ۱۲ میاشتو کې د اوسنۍ کڅوړې په ګډون، د بشري مرستو په ۵۳ کڅوړو کې یو میلیارد ۸۳۰ میلیون او ۴۰۰ زره امریکایي ډالر نغدي مرسته شوې ده.
د افغانستان بانک وایي، دغه بشري مرستې د امریکا متحده ایالتونه، اروپا او نور هېوادونه کوي او د اقتصادي چارو شنونکي وایي، دغه مرستې د افغانستان پر اقتصاد او د خلکو پر ژوند ډېر مثبت اغېز لري.
د یادونې ده، د تېرې مرغومي میاشتې له ۲۴مې وروسته دا د نړۍوالې ټولنې له خوا د ۴۰ میلیون امریکايي ډالرو درېیمه کڅوړه ده چې افغانستان ته را استول کېږي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن