بهرنیو چارو وزارت بلغاریا کې د یو شمېر افغان کډوالو پر مړینه خواشیني ښودلې ده

کابل (پژواک، ۲۹ سلواغه ۱۴۰۱): د بهرنیو چارو وزارت په بلغاریا کې د یو شمېر افغان کډوالو پر مړينه خواشيني ښودلې او پر افغانانو يې غږ کړی چې خپل ژوند دې له ناقانونه او قاچاقي لارو په خطر کې نه اچوي.

د بهرنيو چارو وزارت ویاند عبدالقهار بلخي په خپله ټويټرپاڼه کې د بلغاریا هېواد په صوفیه ښار کې پر یوې پېښې -چې څو افغانانو خپل ژوند په کې له لاسه ورکړی- د دغه وزارت پيغام خپور کړی دی.

په پیغام کې راغلي چې د ۲۰۲۳ کال د فبرورۍ په ۱۷مه نېټه په بلغاریا کې په یوه کانټینري موټر کې -چې د دغه هېواد د پلازمېنې صوفیه پر حلقوي سړک له درې ورځو څخه بند پاتې و- د لوږې، تندې او د اکسيجن کمښت له امله ۱۸ افغانانو خپل ژوند له لاسه ورکړی او پاتې نور د کوربه هېواد مرکزي روغتون ته لېږدول شوي او روغتیا يې د ډاډ وړ دی.

سرچينه کاږي، د افغانستان د بهرنیو چارو وزارت د یادې پېښې له امله د قربانیانو کورنیو ته د تسلیت مراتب وړاندې کوي او یو ځل بیا پر ټولو افغانانو غږ کوي چې خپل ژوند د ناقانونه او قاچاقي لارو له لارې په خطر کې وانه چوي.

login or register a new account.