کابل (پژواک، ۲۱ کب ۱۴۰۱): د ورزش او المپیک ملي کمېټه وایي، افغان لوبغاړي صالحمحمد محمدي د سنوکر په اسیايي سیالیو کې له پنځو میدانونو د څلور په ګټلو سره خپل کويټي سیال ته ماته ورکړه.
د ورزش او المپیک ملي کمېټې په خبرپاڼه کې راغلي، محمدي وکولای شول په قطر کې د اسیايي سنوکر ۳۷م پړاو سیالیو په لومړنۍ لوبه کې خپل کویټي سیال عبدالله کنداري ته له پنځو میدانونو څخه د څلورو میدانونو په ګټلو سره ماته ورکړي.
یادې کمېټې دغه راز لیکلي، له افغانستانه تللی بل لوبغاړی رئیس خان سنزی به هم خپله لومړنۍ لوبه له اردني سیال سره ترسره کړي.
سرچینې لیکلي چې دغه سیالۍ تېره ورځ (د کب ۲۰مه) د قطر په پلازمېنه دوحه کې پیل شوې او د کب تر ۲۷مې به دوام وکړي.
د سرچینې د معلوماتو له مخې، په یادو سیالیو کې له ۲۵ هېوادونو ۴۹ لوبغاړو ګډون کړی دی.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن