<p style="text-align: justify;">کلات (پژواک، ۲۱ کب ۱۴۰۱): د زابل چارواکي وايي، د کابل- کندهار پر عمومي لاره او د دغه ولایت په سيوري ولسوالۍ کې د دوو موټرو د اوښتو په پېښو کې ۱۵ تنه ټپیان شوي دي.</p>
<p style="text-align: justify;">د زابل د امنیې قوماندانۍ ویاند ذبیح الله جوهر پژواک خبري اژانس ته وویل، چې نن (یکشنبه) مازیګر شاوخوا پنځه بجې د کابل- کندهار پر لویه لاره د ارهډ مانده په سیمه کې د ۴۰۴ موټر د چپه کېدو په پېښه کې لس تنه ټپیان شوي دي.</p>
<p style="text-align: justify;">نوموړی زیاتوي، ټپیان د پولیسو له لوري روغتیايي مرکزونو ته د درملنې لپاره لېږدول شوي دي. په ټپيانو کې اته نارینه او دوه مېرمنې دي.</p>
<p style="text-align: justify;">د هغه په وینا، پېښه د موټر چلوونکي د بېاحتیاطۍ او ګړندي تګ له امله رامنځته شوې ده.</p>
<p style="text-align: justify;">د زابل د عامې روغتیا ریاست چارواکي بیا وايي، چې د پېښې له سیمې دوی ته دولس ټپیان ور وړل شوي دي.</p>
<p style="text-align: justify;">د زابل د عامي روغتیا رئیس ډاکټر میرویس افغان پژواک اژانس ته وویل، د ۴۰۴ موټر د چپه کېدو وروسته د روغتیايي ټیم په ملتیا سیمې ته تللي وو، چې د پېښې دولس تنه ټپیان یې د فولادګي او دغه راز د ښارصفا ولسوالۍ روغتیايي مرکزونو ته انتقال کړل، چې په خبره یې د ټپیانو زخمونه سطحي وو او د ټولو کسانو درملنه شوې ده.</p>
<p style="text-align: justify;">د زابل د امنيې قوماندانۍ ویاند دغه راز وايي، په همدې ورځ د دې ولایت په سیوري ولسوالۍ کې هم د یوه تېز رفتار موټر د اوښتو له امله درې تنه ټپیان شوي دي.</p>
<p style="text-align: justify;">نوموړي پژواک ته وویل: «نن مازیګر د سیوري ولسوالۍ د میراخور په سیمه کې یو فوربکس موټر چپه شوی، چې درې تنه په کې زخمیان شوي دي، زخمیان مو ولایتي روغتون ته انتقال کړی دي.»</p>
<p style="text-align: justify;">دا پېښې په داسې حال کې رامنځته کېږي چې څو ورځې وړاندې هم په زابل کې په دوو جلا ترافیکي پېښو کې یو تن مړ او څلور نور ټپیان شوي وو.</p>
