مهترلام (پژواک، ۲۲ کب ۱۴۰۱): د لغمان ولیت په مرکز مهترلام کې د لیني موټرو لپاره د ۳۸ میلیون افغانیو په لګښت معیاري ترمینل پرانیستل شو.
د دغه ولایت والي قاري زینالعابدین عابد پژواک خبري اژانس ته وویل چې دغه ترمینل د لغمان ښاروالۍ له خوا د یو کال په موده کې جوړ شوی دی.
هغه زیاته کړه چې په یاد ترمینل کې یو رسټورانټ، د نارینه او ښځینه وو لپاره جومات او جلا جلا انتظارخونې لري.
د لغمان ښاروال مولوي رحمتالله شهامت پژواک خبري اژانس ته وویل، دغه ترمینل پر ۲۵ جریب ځمکه کې جوړ شوی چې د کابل او ننګرهار لینونو موټر به ورته راځي.
بلخوا موټرچلوونکي او عام خلک هم د لغمان ښاروالۍ د دغه اقدام ستاینه کوي او وايي چې پخوا يې معیاري ترمینل نه درلود.
د کابل لین یوه موټرچلوونکي مارشال وویل، پخوا به دوی مشخص ځای نه درلود او مسافر به يې د سړک له سره پورته کول.
خو زیاتوي چې اوس یو معیاري ترمینل جوړ شوی چې د موټرچلوونکو او مسافرو لپاره هر ډول اسانتیاوې لري.
د دغه ولایت د الینګار اوسېدونکي احسانالدین چې د کابل - ننګرهار په لین موټر چلوي وویل، پخوا به دوی په مهترلام ښار کې د موټر درولو لپاره ځای نه درلود او د مسافرو پيدا کولو پر مهال به له ستونزو سره مخ وو.
د نوموړي په خبره، د لغمان ښاروالۍ په دغه کار سره نه یوازې موټرچلوونکو او مسافرو ته اسانتیاوې برابرې کړې، بلکې د ښار ښکلا هم ورسره زیاته شوې ده.
