د عامې روغتیا وزارت: نړۍ دې له افغانستان سره د روغتيا په برخه کې اوږه په اوږه ودرېږي

کابل (پژواک، ۱۹ وری ۱۴۰۲): د عامې روغتيا وزارت سرپرست د دې ترڅنګ چې وایي، د هېواد لرو سيمو ته به معياري روغتيايي خدمات رسوي، پر نړۍوالې ټولنې غږ وکړ چې له افغانستان سره د روغتيا په برخه کې اوږه په اوږه ودرېږي او د روغتيايي سکټور ملاتړ وکړي، څو د هېواد هر وګړی د روغتيا په برخه کې له خپلو حقونو برخمن شي.

د عامې روغتيا وزارت سرپرست ډاکټر قلندر عباد دغه څرګندونې د روغتيا نړۍوالې ورځې په مناسبت کړې دي.

پرون د وري میاشتې ۱۸مه/ د اپرېل ۷مه، د روغتیا له نړۍوالې ورځې سره برابره وه.

د عامې روغتیا وزارت سرپرست د همدې ورځې په مناسبت په یوه لیکلي پیغام کې ویلي: «خوښ يم چې سږ کال د روغتيا نړۍواله ورځ (روغتيا د ټولو لپاره) تر ستر او هيله بخښونکي شعار لاندې نمانځل کېږي.»

هغه لیکلي، روغتيايي خدمات بايد تل بې‌پرې او د ټولې انساني ټولنې لپاره يو ډول وي، د دې نړۍ هر انسان حق لري چې پر وخت ورته د اړتیا وړ معياري روغتيايي خدمات وړاندې شي.

نوموړی زیاتوي، د افغانستان د لرو سيمو اوسېدونکو ته د نوو روغتيايي مرکزونو جوړول، د تغذيې برخې غني کول، د معافيت او روغتيايي پرسونل ظرفيت لوړونې لپاره لا هڅې، په معالجوي او تشخيصيه برخو کې لا معياري وسايل ترلاسه کول د هېواد د روغتيايي سيسټم اړتیاوې دي.

ډاکټر عباد ویلي، دا چې په تېرو کلونو کې نږدې پنځوس سلنه خاوره او اوسېدونکي يې له روغتيايي خدماتو محروم شوي وو، په لرو سيمو کې د روغتيايي خدماتو څرک نه ليدل کېده، تر ډېره روغتيايي خدمات غيرمعياري او خيالي وو، روغتيايي خدماتو ته د خلکو لاسرسی له محدودیتونو او خنډونو سره مخ وو، نو پر همدې اساس د افغانستان په روغتيايي سيسټم کې لا ډېر کار ته اړتيا ليدل کېږي.

د نوموړي په خبره، تمه دا ده چې د هېواد د حاکم نظام د ژمن ټيم او نړۍوالې ټولنې په مرسته به دا ستونزې حل شي، د افغانستان هر وګړي ته معياري روغتيايي خدمات ورسېږي او د افغانستان د عامې روغتيا وزارت يو ځل بیا ژمنتیا څرګندوي چې د خپل هېواد د هر وګړي د روغتيا لپاره به کار کوي او د هېواد تر لرو سيمو به معياري روغتيايي خدمات رسوي.

په ورته مهال، د روغتیا نړۍوال سازمان له جزییاتو ورکولو پرته لیکلي چې سږ کال د یادې ورځې په مناسبت د خپل تاسیس ۷۵مه کلیزه نمانځي.

د لسیزو په تېرېدو سره، افغانستان د روغتیا په برخه کې اړین پرمختګ نه دی کړی او لا هم نړۍوالو مرستو ته اړتیا لري؛ ډېری افغانان اړ کېږي چې د ښې درملنې لپاره ګاونډیو هېوادونو ته لاړ شي.