د افغانستان بانک سبا ۱۴ میلیون ډالر لیلاموي

کابل (پژواک، ۲۷ وری ۱۴۰۲): د افغانستان مرکزي بانک اعلان کړی چې سبا (دوشنبه) ۱۴ میلیون امریکایي ډالر د داوطلبۍ له لارې لیلاموي.

د هېواد مرکزي بانک نن د یوه ټوېټ په خپرولو سره له ټولو هغو سوداګریزو بانکونو، صرافانو او د پولي خدمتونو له شرکتونو چې پر شرایطو برابر وي، غوښتي څو په دې داوطلبۍ کې ګډون وکړي.

یاد بانک زیاته کړې چې د داوطلبۍ ګټونکي باید خپل حسابونه د لیلام ورځې تر پایه تصفیه کړي.

یاد بانک په ډاګه کړې چې د اسعارو د لیلام په داوطلبۍ کې د معاملاتو قسمي تسویې ته اجازه نه ورکول کېږي، د لیلام ګټونکي باید د خپل ذمت د قیمت پیسې په یو ځل، په نغد ډول او په ټاکلې موده کې دغه بانک ته وسپاري.

د یادونې ده، مرکزي بانک د روان کال د وري په ۲۴مه هم ۱۵ میلیون امریکايي ډالر لیلام کړي وو.