<p style="text-align: justify;">لښکرګاه (پژواک، ۱۲ غویی ۱۴۰۲): د هلمند په مرکز لښکرګاه کې نن د دغه ولایت له نږدې څلور زرو دیني عالمانو څخه د لويې دورې د اسنادو ارزونې او ازموینې بهیر پيل شو.</p>
<p style="text-align: justify;">د یادې پروسې د څارنې لپاره له کابله د هېواد د ازموینې ملي ادارې مشر شیخ عبدالباقي حقاني هم ورغلی و.</p>
<p style="text-align: justify;">هغه په یادو مراسمو کې وویل: «کوم دیني عالمان چې لوړه دوره یې بشپړه کړې وي او اسناد یې تصدیق ولري، په ازموینه کې برخه اخیستی شي.»</p>
<p style="text-align: justify;">نوموړي زیاته کړه، په ننۍ ازموینه کې د ګډون لپاره نږدې څلور زرو دیني عالمانو نوملیکنه کړې ده.</p>
<p style="text-align: justify;">په ورته وخت کې، د هلمند پوهنتون رییس پوهنیار محمد سورګل عبدالرحمن د دې پروسې هرکلی وکړ او ويې ویل، په دې سره دیني عالمان کولی شي چې رسمي تحصیلي اسناد ترلاسه کړي.</p>
<p style="text-align: justify;">هغه زیاته کړه: «اوس د اسلامي امارت په رامنځته کېدو سره هغه دیني عالمان چې کلونه کلونه یې زحمت ایستی وي، د هغوي د زیار په بدله کې د لیسانس او ماسټرۍ تر کچې اسناد ورکول کېږي.»</p>
<p style="text-align: justify;">بلخوا هغه دیني عالمان چې په یاده پروسه کې يې ګډون کړی هم خوښ دي چې له ارزونې وروسته تحصیلي اسناد ورکړل شي.</p>
<p style="text-align: justify;">یو دیني عالم مولوي محمدثاقب وایي: «دا پروسه ډېره ګټوره ده، له یوه پلوه به مو اسنادونه وکتل شي او له بلي خوا به بیا د لیسانس اسنادونه راکړل شي. «</p>
<p style="text-align: justify;">یو بل دیني عالم مولوي نیکمحمد وویل، که چېرې دوی په ازموینه کې بریالي شي نو د خپلې وړتیا مطابق به هېواد ته خدمت وکړي.</p>
<p style="text-align: justify;">د یادونې ده، دا په هلمند کې لومړی ځل چې له دومره ډېر شمېر دیني عالمانو څخه ازموېنه اخیستل کېږي او د لوړو زدهکړو وزارت اسناد ورکول کېږي.</p>
