کلات (پژواک، ۲ غبرګولی ۱۴۰۲): د زابل د کلیو پراختیا او بیارغونې ریاست مسوولین وايي، نن د دغه ولایت په مرکز او شاهجوی ولسوالۍ کې د ملګرو ملتونو پراختيايي ادارې له خوا د څه باندې ۲۳۳ زره ډالرو په لګښت د ۱۲ استنادي دېوالونو جوړولو چارې بشپړې شوې.
د یاد ولایت د کلیو پراختیا او بیارغونې رییس مولوي حکمتالله رهبر پژواک خبري اژانس ته وویل: «دغه استنادي دېوالونه په مرکز کلات کې د سپنې اغبرګې او نورک سیمو کې او همدا ډول د دغه ولایت د شاهجوی ولسوالۍ په جعفرو او جمالخېلو سیمو کې د ۵۷۶۰ متره مکعبه په اوږدوالي ګټې اخیستنې ته وسپارل شول.»
رهبر زیاتوي، پر یادو پروژو ۲۳۳ زره ۵۶۸ امریکايي ډالر لګښت راغلی چې د ملګرو ملتونو پراختیايي ادارې (UNDP) له خوا ورکړل شوي دي.
د هغه په وینا، د یادو استنادي دېوالونو جوړولو چارې د شپږو میاشتو په موده کې بشپړې شوې چې ۲۵۰ کسانو پکې ته د کار زمینه هم برابره شوې وه.
نوموړي وویل، د یادو استنادي دېوالونو په جوړېدو سره ۶۵۰۰ هکټاره کرنیزه ځمکه د سېلابونو له ګواښه وژغورل شوه.
د یادو سیمو اوسېدونکي او کروندګر د استنادي دېوالونو له جوړېدو خوښ دي او وايي، په دې سره به د دوی ځمکې له سېلابونو وژغورل شي.
د مرکز کلات د سپنې اغبرګې کلي یوه اوسېدونکي نعمتالله وویل، د دوی ځمکې ترنک سیند ته نږدې دي چې په ژمي کې به د ډېرو سېلابونو او اورښتونو له امله له زیان سره مخ کېدل.
هغه زیاته کړه، اوس د ملګرو ملتونو پراختیايي پروګرام له لوري استنادي ورته جوړل شول او ځمکې یې له زیانمنېدو وژغورل شوې.
د شاهجوی ولسوالۍ د جمالخېلو کلي اوسېدونکي عبدالغني وویل، د استنادي دېوالونو جوړولو چارو کې دوی ته د کار زمینه هم برابره شوې وه.
هغه له حکومت څخه د دغه ډول نورو پروژو پلې کولو غوښتنه وکړه او وویل، له دې سره به هم خلکو ته د کار زمینه برابره شي او هم به یې ځمکې له سېلابونو وژغورل شي.
