د هرات ځیني اوسېدونکي د لوی اختر په درشل کې د بيو له لوړېدو شکایت لري

<p style="text-align: justify;">هرات (پژواک، ۵ چنګاښ ۱۴۰۲): د لوى اختر په نږدې کېدو سره د هرات ښار او بازارونو يو ځانګړی حالت خپل کړی؛ په دغه ولايت کې ډېر خلک د لوى اختر نمانځلو لپاره د اړتيا وړ توکو پېرلو په موخه بازارونو ته ځي.</p>

<p style="text-align: justify;">که څه هم د هرات په بازارونو کې د تېرو کلونو په څېر ګڼه‌ګوڼه نه تر سترګو کېږي، خو د دغه ولايت يو شمېر اوسېدونکي د لوى اختر په درشل کې د توکو پر بیو د کنټرول نشتوالي له امله نیوکه لري.</p>

<p style="text-align: justify;">د یاد ولایت یوه اوسېدونکي حاجي عبدالرووف له پژواک سره په خبرو کې وویل، هر کال د اختر په رارسېدو سره د وچو مېوو بيې په بې‌ساري ډول لوړېږي، خو د اړوندو ادارو له لوري جدي کنټرول پرې نشته.</p>

<p style="text-align: justify;">هغه د هرات له ښاروالۍ غواړي څو د وچې مېوې او نورو توکو پر بیو بشپړ کنټرول ولري.</p>

<p style="text-align: justify;">هغه وویل: «د لوی اختر په را رسېدو سره هر پلورونکی په خپله خوښه بیه ټاکي او پر خلکو مېوې په لوړه بیه پلوري، د ښاروالۍ اداره پر نرخونو کنټرول نه لري.»</p>

<p style="text-align: justify;">د یاد ولایت یو بل اوسېدونکی صدیق‌الله هم ادعا کوي چې د اختر په شپو او ورځو کې د مېوو بیې لوړېږي او حکومت باید دې برخې ته جدي پاملرنه وکړي.</p>

<p style="text-align: justify;">د هرات د دغه اوسېدونکي په خبره، په وروستیو کلونو کې د خلکو اقتصادي وضعیت خراب شوی او خلک د بیو کنټرول ته اړتیا لري، څو په دې برخه کې لا ډېره پاملرنه وشي.</p>

<p style="text-align: justify;">په دغه حال کې، که څه هم د هرات ښار هټۍوال وایي چې د وچو مېوو بیې د تېر کال په پرتله ټيټې شوې دي، خو د هغو په خبره، خلک د اقتصادي ستونزو له امله د اختر لپاره د وچو مېوو پېرلو وس نه لري او د خرڅلاو بازارونه کمرنګه شوي دي.</p>

<p style="text-align: justify;">د هرات ښار چهارسوی څلورلارې کې یوه مېوه پلورونکي عبدالعظیم پژواک ته وویل، د سږ کال په پرتله په تېرو کلونو کې د وچو مېوو پلور ډېر وو، خو اوس د خرڅلاو بازارونو کې د پخوا په څېر ګڼه ګوڼه نشته.</p>

<p style="text-align: justify;">نوموړي هیله څرګنده کړه چې حکومت خلکو ته د کار زمینه برابره کړي، څو اقتصادي وضعیت یې ښه شي او دا چاره به د اقتصاد پر بازار هم مستیقم اغېز ولري.</p>

<p style="text-align: justify;">په دغه حال کې، د هرات ښاروالۍ مسوولین د اختر په ورځو کې پلورونکو ته د نرخ‌پاڼو د ورکړې خبره کوي او زیاتوي چې په دغه ولایت کې به هیچا ته په لوړه بیه د توکو پلورلو اجازه ورنه‌کړي.</p>

<p style="text-align: justify;">د یاد ولایت د ښاروالۍ ویاند ناصر آرمل د خلکو دغه ادعا چې ګواکې د ښاروالۍ ریاست پر نرخونو کنټرول نه لري رد کړه وویل، د دغې ادارې د مارکېټونو تنظیم امریت پنځه کاري ټیمونه هره ورځ په ټول ښار کې ګرځي او بیې کنټرولوي.</p>

<p style="text-align: justify;">آرمل وویل، هر څوک چې د ښاروالۍ له نرخ‌پاڼو سرغړونه وکړي، قانوني چلند به ورسره وشي.</p>

<p style="text-align: justify;">د یادونې ده، د کار نشتوالی او بې‌کاري د دې لامل شوی چې دغه حالت په مستقیمه توګه د خلکو پر اقتصاد اغېز ولري او اوس د اختر په ورځو کې دغه ولایت کې هیلې دا دي چې د ښاروالۍ له خوا ټاکل شوې نرخ‌پاڼې تر یوه په لوړه بیه د توکو پلورلو مخنیوی وکړي څو هېوادوال په اسانۍ سره د اړتیا وړ توکي وپېري.</p>