اروزګان کې د نشه‌يي توکو د تولید یوه کارخونه له منځه وړل شوې ده

ترینکوټ (پژواک، ۲۹ چنګاښ ۱۴۰۲): د اروزګان امنیتي مسوولین وايي چې د دغه ولایت په چارچینو او چورې ولسوالیو کې د نشه‌يي توکو یوه کارخونه او زر کیلوګرامه ومان  کشف او له منځه وړل شوي دي.

د دغه ولایت امنیې قوماندانۍ ویاند بلال‌احمد اروزګاني پژواک خبري اژانس ته وویل، تېره شپه امنیتي ځواکونو د چارچینو ولسوالۍ په مربوطاتو کې د نشه‌يي توکو پروسس یوه کارخانه کشف کړې او له منځه وړې ده.

هغه زیاته کړه چې په دې کارخونه کې ۳۳۵ کیلوګرامه ومان، ۳۰۰ لېتره ډېزل او د پروسس نور وسایل هم نیول شوي او سوځول شوي دي.

دی وايي، نن سهار اته بجې هم امنیتي ځواکونو د چورې ولسوالۍ په کوتل سیمه کې د عملیاتو پر مهال ۶۶۵ کیلوګرامه ومان ترلاسه کړي او سوځولي دي.

نوموړي زیاته کړه چې د یادو پېښو په تړاو تر اوسه څوک نه دي نیول شوي.