بامیان کې د ترافیکي پېښې له امله یوه کس ژوند له لاسه ورکړی

بامیان (پژواک، ۲۸ زمری ۱۴۰۲): بامیان کې مسوولین وایي، د دغه ولایت په مرکز کې د ترافیکي پېښې له امله یوه کس ژوند له لاسه ورکړی دی.

د بامیان امنیې قوماندانۍ ویاند محمدخواني رسا پژواک خبري اژانس ته وویل، د دغه ولایت د مرکز اړوند «شهیدان» سیمه کې یو کرولا موټر له بایسکل سره ټکر شوی چې له امله یې بایسکل چلوونکی مړ شوی دی.

د هغه په خبره، دا پېښه د جمعې په ورځ (د زمري ۲۷مه) له غرمې وروسته شاوخوا درې نیمې بجې د شهیدان سیمې په «عمبرسموچ» کلي کې شوې ده.

نوموړي زیاته کړه، موټرچلوونکی نیول شوی او د بامیان امنیې قوماندانۍ د ترافیک مدیریت تر نظارت لاندې دی.

login or register a new account.