مزارشریف (پژواک، ۳۰ زمری ۱۴۰۲): د بلخ ولایت مقام وایي چې ژورنالېست داوود جنبش د بلخ له والي یوسف وفا سره په لیدنه کې ویلي، کوم څه چې د افغانستان په اړه په میډیا کې ویني او اوري، د دښمن تبلیغات دي.
د بلخ ولایت مقام د رسنیو او معلوماتو مرکز په خپره شوې خبرپاڼه کې راغلي، د بلخ والي یوسف وفا د بيبيسي نړۍوال راډیو ټلوېزیون له یو شمېر خبریالانو سره وکتل.
خبرپاڼه زیاتوي، د داوود جنبش په ګډون یادو خبریالانو د افغانستان ګڼو ولایتونو ته له سفر وروسته بلخ ولایت ته راغلل و د قوشتیپې له کاناله یې هم لیدنه وکړه.
سرچینه کاږي، د خبریالانو په استازولۍ محمد داوود جنبش د سرپرست حکومت کړنې وستایلې او ویې ویل: «موږ ټول سره وروڼه یو، د هېواد د پرمختګ او ځانبساینې لپاره ټول مسوولیت لرو او په ګډه د دغه هېواد د ترقۍ ور پرانیزو.»
جنبش زیاته کړه: «هغه څه چې موږ د میډیا له لارې اورو دا ټول د هېواد د دښمنانو تبلیغاتي سیاست دی او دا ډېره لویه لاستهراوړنه ده چې په ټول هېواد کې بشپړ امنیت ټینګ دی.»
هغه دغه راز وویل: «افغانستان زموږ ټولو ګډ کور دی، باید ټول په ګډه د کلتور، عنعناتو او افغاني او اسلامي ارزښتونو دودولو برخه کې مثبت بدلون راولو، څو زموږ هېوادوال په هیڅ کومه برخه کې شاتګ ونه کړي.»
خو د ولایت مقام له اعلامیې وروسته داوود جنبش په ایکس (ټویټر) کې لیکلي: «له بيبيسي او یا بلې کومې رسنۍ سره کار نه کوم او د هېواد د سیاسي حالاتو په اړه د رسنیو یا نارسنیو پر ونډه هم نه غږېږم/ نه یم غږېدلی. په افغانستان کې زما کتنې بېخي ناسیاسي او یوازې د معلوماتو ټولولو او ځان پوهولو لپاره دي.»
ضروري یادونه:
زه له بي بي سي او یا بلې کومې رسنۍ سره کار نه کوم او د هېواد د سیاسي حالاتو په اړه د رسنیو یا نا رسنیو پر ونډه هم نه غږېږم/ نه یم غږېدلی.
په افغانستان کې زما کتنې بېخي نا سیاسي او یوازې د معلوماتو د ټولولو او ځان پوهولو له پاره دي.— Daud Junbish 🇦🇫 (@DaudJunbish) August 21, 2023
د بلخ والي محمدیوسف وفا یادو خبریالانو ته ښه راغلاست ووایه او زیاته یې کړه، دمګړۍ په ټول هېواد کې بشپړ امنیت ټینګ دی، هدفي وژنې، غلاوې، زورواکي، فساد او نشهیي توکي صفر ته راټیت شوي.
هغه زیاته کړه، رسنۍ هغه څه دي چې د نظام او ولس ترمنځ واټن کموي، د رسنیو، په ځانګړې توګه د خبریالانو ډېر دروند او لوی مسوولیت دی چې د افغانستان روان وضعیت په سمه توګه وڅېړي او نړۍوالو ته یې رښتینی انځور ورسوي.
دا لیدنه په داسې حال کې ترسره کېږي چې له دې مخکې د سرپرست حکومت مشرانو په هېواد کې د بيبيسي او یو شمېر نورو نړۍوالو رسنیو خپرونې بندې کړې دي.
Views: 2361
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن