پاراخ (پژواک، د وږي لومړۍ نېټه ۱۴۰۲): د پنجشېر د اطلاعاتو او فرهنګ ریاست، د دغه ولایت د پریان ولسوالۍ وریاج دره کې د پستې په نوم د یوې نوې لرغونې سیمې د پېژندنې خبر ورکوي.
د پنجشېر د اطلاعاتو او فرهنګ رییس نصرالله ملکزاده پژواک خبري اژانس ته وویل، د دغه ریاست لومړنۍ څېړنې ښیي چې د دغې لرغونې سیمې مخینه تر اسلام وړاندې زرګونو کلونو ته رسېږي.
نوموړي وویل چې څلور زره کاله مخکې په دې سیمه کې بودایانو ژوند کاوه.
ملکزاده وایي: «لا ډېرې څېړنې ته اړتیا ده چې د دې سیمې د لیدنې لپاره د اطلاعاتو او فرهنګ له وزارته یوه ډله لرغون پوهان راوغوښتل شي او سیمه دې له نږدې و ارزوي.»
بودایي دین د هند اریایي پاچا اشوکا په دوره کې افغانستان ته راغلی او د اسلام د دین له راتګ مخکې یې پیروان درلودل.
د پنجشېر د اطلاعاتو او فرهنګ ریاست د فرهنګ او ګرځندوی آمر محمدصابر دانشجو هم وایي: «په سیمه کې موجود سفالي لوښي او د خلکو نظریې ښیي چې بودایانو په ځانګړي دود سره په اوړي کې هلته (پسته سیمه) ژوند کاوه.»
د پنجشېر د اطلاعاتو او کلتور ریاست له دې مخکې هم د پنجشېر لومړۍ حصې ولسوالۍ په متا کلي کې د درېیو تاریخي ځایونو د پېژندل کېدو خبر ورکړی و او ویلي یې وو چې دا ابدې د «شکرالله بیک، انار او مرزا محمد» په نوم یادېږي او د وړاندوینو له مخې، د دې تاریخي مخینه له ۱۵۰ تر ۴۵۰ کلونو ته رسېږي.
Views: 69
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن