جلالاباد (پژواک، ۱۹ تله ۱۴۰۲): ختيځ کې د ۲۰۱ خالد بن وليد قولاردو چارواکي وايي، د ننګرهار په سپينغر ولسوالۍ کې يې د ۹۰ کلچې خامو چرسو د قاچاق په تور شپږ کسان نيولي دي.
د مسوولینو په وينا، په نیول شوو کې څلور د خيبر پښتونخوا او دوه د ننګرهار اوسېدونکي دي.
په ختيځ کې د ۲۰۱ خالد بن وليد قولاردو وياند مولوي وحيدالله محمدي د تلې په ۱۹مه پژواک خبري اژانس ته وويل، تېره شپه د ننګرهار سپينغر ولسوالۍ د مامند درې په مورګې سيمه کې د یوه اندازه چرسو د قاچاق په تړاو شپږ کسان نيول شوي دي.
دی وايي، له دغو کسانو څه باندې سل کیلوګرامه چرس هم ترلاسه شوي دي.
هغه زياته کړه: «دغه کسان هغه مهال نیول شوي چې غوښتل يې یاد نشهيې توکي له فرضي کرښې پورې غاړه واړوي، نیول شوي کسان د قانوني مراحلو له طی کولو وروسته اړوند قانوني مرجع ته استول شوي.»
د ننګرهار د اطلاعاتو او کلتور رياست هم پژواک ته د يوې خبرپاڼې په لېږلو دغه خبر تاييد کړی دی.
څو ورځې مخکې هم د خالد بن وليد قولاردو مسوولينو د ننګرهار دوربابا ولسوالۍ کې د نشهيي توکو د قاچاق په تړاو ۲۸ کسان نيولي وو.
GET IN TOUCH
NEWSLETTER
SUGGEST A STORY
PAJHWOK MOBILE APP