فېروزکوه (پژواک، ۲۶ تله ۱۴۰۲): د غور ځایي مسوولینو دغه ولایت ته د ملګرو ملتونو د علمي او فرهنګي سازمان (یونسکو) د یوه پلاوي د سفر خبر ورکړی، وایي چې ډېر ژر به د جام منار د بیارغولو چارې پیل شي.
جام منار د فېروزکوه ښار د لوېدیځ په ۷۰ کیلومترۍ کې په کمنج سیمه موقعیت لري، دا منار له ۸۳۰ کلونو ډېره مخینه لري چې د سلطان غیاثالدین غوري په وخت کې جوړ شوی، خو د حکومتونو نه پاملرنې له امله د له منځه تلو په حال کې دی.
د غور د اطلاعاتو او فرهنګ رییس مولوي عبدالحی زعیم پژواک خبري اژانس ته ویل: «د جام منار د له منځه تلو خبره مې څو ځلې له مرکز او یونسکو سره شریکه کړې، له نېکه مرغه د یونسکو فرهنګې برخه غور ته راغلې او د جام منار سیمې ته لاړل او له نږدې یې وضعیت ولیده.»
هغه وویل: «د یونسکو له مسوول سره مې چې ناسته لرله له موږ سره یې ژمنه وکړه چې د دغه منار د بیارغونې چارې ژر پیلوي، موږ ته یې وویل چې دا منار له بدنې تر لومړي بالکن پورې چې د منار ۴۰ تر ۴۳ مترۍ رسېږي ترمیموي او دا کار پرمختللو وسیلو ته اړتیا لري، د یونسکو له ټولو شته امکاناتو سره به دغه منار بیاورغول شي.»
د غور د اطلاعاتو او فرهنګ رییس په خبره، د یونسکو فرهنګي مسوول دغه راز ویلي چې د دغه منار د حرکت د تشخیصلو په موخه په سیمه کې یوه لویه دستګاه نصبوي، څو د هغه حرکت هم معلوم کړي.
د جام منار د ابدو د ساتنې مدیر بهاوالدین د دغه منار د بیروني تزییناتو له منځه تلو د اندېښنې په څرګندولو سره پژواک ته وویل: «کله ناکله د منار بیرونۍ خښتې غورځیږي، که بیارغونې یې ونه شي، له منځه به لاړ شي.»
نوموړي هیله څرګنده کړه چې د دې منار کار ژر پیل شي، او ویې ویل چې د ورځې له دوو تر درېیو د یاد منار د نما خښتې راټولوي.
د غور یو اوسېدونکی عبدالقدیر ابراهیمي هم له اسلامي امارت او له یونسکو غواړي چې د دغه منار د بیارغونې چارې دې ژر پیل کړي.
Views: 23
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن