پلخمري (پژواک، ۲۷ وږی ۱۴۰۲): د بغلان لسګونو قومي مشرانو په یوه غونډه کې د اوبو او برېښنا له سرپرست وزیره په دغه ولایت کې د اوبو سپما لپاره د کوچنیو بندونو جوړولو غوښتنه وکړه.
په دې غونډه کې د ډنډغوري قومي مشر محمد جمعه وویل، سږ کال په دغه ولایت کې وچکالي ډېره وه چې له امله يې د کروندګرو فصلونو ته په سم ډول اوبه ونه رسېدې.
هغه وايي چې د یادې ستونزې د حل په موخه د راتلونکي کال لپاره حکومت باید په دغه ولایت کې د اوبو ذخیره کېدو لپاره کوچني بندونه جوړ کړي.
دغه راز د مرکزي بغلان ولسوالۍ د انکشافي شورا رییس محمدشاه وویل، دغه ولسوالي د بغلان تر ټولو حاصل خېزه سیمه ده خو له بده مرغه یوازې یو نهر لري چې ټولو ځمکو ته يې اوبه نه رسېږي.
دی وایي، که د مرکزي بغلان ولسوالۍ ځینو سیمو کې د اوبو د سپما په موخه چکډیمونه جوړ شي، د دې ولسوالۍ کرنیز حاصلات به دوه برابره شي.
په دې غونډه کې یو شمېر نورو کسانو هم ورته څرګندونې وکړې.
د یادو څرګندونو په اړه د اوبو او برېښنا سرپرست وزیر عبدالطیف منصور وویل، بغلان ته یې د راتګ موخه د دغه ولایت د اوسېدونکو ستونزو اورېدل وو.
هغه وویل، د خلکو غوښتنې یې واورېدې خو ورته رسېدنه وخت ته اړتیا لري.
هغه دا هم وویل، حکومت غواړي د دغه ولایت په کیلهګي سیمه کې د برېښنا یو بند جوړ کړي، دی راغلی څو سیمه له نږدې وګوري او په اړه يې مشوره وکړي.
Views: 20
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن