کابل (پژواک، ۷ وږی ۱۴۰۵): د کډوالو ستونزو ته د رسېدنې کمېسیون وایي، تېره ورځ له ایران او پاکستان څخه ۴۳۹ کورنۍ چې ۲۰۷۱ کسان کېږي، هېواد ته راستنې شوي؛ ۳۶۸ کورنۍ بېلابېلو ولایتونو ته لېږدول شوې او له ۴۴۵ کورنیو سره نغدي او نورې مرستې شوې دي.
د اسلامي امارت مرستیال ویاند ملا حمدالله فطرت پر خپله اېکسپاڼه د کډوالو ستونزو ته د رسېدنې کمېسیون د تېرې ورځې راپور خپور کړی دی.
د دغه کمېسیون د راپور له مخې، د تورخم له لارې ۳۶۷ کورنۍ چې ۱۸۰۵ کسان کېږي، هېواد ته راستنې او ثبت شوې دي.
د کمېسیون د معلوماتو له مخې، له تورخم څخه ۳۱۸ کورنۍ چې ۲۳۰۸ کسان کېږي، ننګرهار، کونړ، لغمان او کابل ولایتونو ته لېږدول شوي او د ترانسپورټ لپاره یې یو میلیون او ۶۷۰ زره افغانۍ ورکړل شوې دي.
سرچینه زیاتوي چې په تورخم کې له ۴۰۹ کورنیو سره په ټولیز ډول دری میلیونه او ۴۸۶ زره افغانۍ نغدي مرسته شوې ده.
د کندهار د سپینبولدک له لارې هم ۱۳ کورنۍ چې ۵۵ کسان کېږي، هېواد ته راستنې شوې دي.
د راپور له مخې، له دې ډلې ۱۴ کورنۍ چې ۵۰ کسان کېږي، بېلابېلو ولایتونو ته لېږدول شوې او د ترانسپورټي لګښتونو لپاره یې څه باندې ۱۰۴ زره افغانۍ ورکړل شوې دي.
سرچینه زیاتوي چې په سپینبولدک کې له ۱۴ کورنیو سره په ټولیز ډول ۱۱۴ زره افغانۍ مرسته شوې او خوراکي، روغتیایي او مخابراتي خدمات هم ورته وړاندې شوي دي.
د دغه راپور له مخې، د نیمروز د ورېښمو پله له لارې ۴۲ کورنۍ چې ۱۶۴ کسان کېږي، هېواد ته راستنې شوې او همدارنګه ۱۰۱۷ مسافر هم راستانه شوي دي. هلته د نغدي مرستو په برخه کې له پنځو کورنیو سره په ټولیزه توګه ۴۲ زره افغانۍ مرسته شوې ده.
دغهراز سرچینه زیاتوي چې د هرات د اسلامکلا بندر له لارې هم ۱۷ کورنۍ چې ۴۷ کسان کېږي، هېواد ته راستنې شوې دي او په ټولیز ډول له ۱۷ کورنیو سره ۱۰۲ زره افغانۍ مرسته شوې ده.
په خبرپاڼه کې راغلي چې د انتقال او ترانسپورټ کمېټې له کابل څخه ۳۶ کورنۍ چې ۱۶۹ کسان کېږي، بېلابېلو ولایتونو ته لېږدولي او ۱۴۷ زره او ۶۰۰ افغانۍ یې هم ورکړي دي.
سرچینې لیکلي چې په ټوله کې ۴۳۹ کورنۍ چې ۲۰۷۱ کسان کېږي، هېواد ته راستنې شوي، ۳۶۸ کورنۍ چې ۲۵۲۷ کسان کېږي بېلابېلو ولایتونو ته لېږدول شوي، له ۴۴۵ کورنیو سره مرستې شوي او هغوی ته د مخابراتي شبکو ۳۶۳ سیمکارتونه هم ورکړل شوي دي.
