کابل (پژواک): د افغانستان لپاره د ملګرو ملتونو د سرمنشي ځانګړې استازې رباب فاطمې تورخم ته د خپل سفر په ترڅ کې د راستنېدونکو عمري کمپ کې د لومړنیو روغتیايي خدمتونو له هغه مرکزه لیدنه کړې چې د روغتیا نړۍوال سازمان يې تمويلوي.
د روغتیا نړۍوال سازمان د افغانستان څانګې پر خپله پاڼه لیکلي چې د دې لیدنې پر مهال د دغه سازمان کارکوونکو نوموړې ته راستنېدونکو ته د وړاندېکېدونکو روغتیايي خدمتونو په اړه معلومات ورکړل.
رباب فاطمې د زیانمنونکو کورنیو لپاره روغتیايي خدمتونو ته د لاسرسي برخه کې د روغتیا نړۍوال سازمان رول مهم بللی او په دې برخه کې یې د دغه سازمان د هڅو ستاینه کړې ده.
