بامیان (پژواک، ۲۹ تله ۱۴۰۲): د ټولګټو وزارت سرپرست بامیان ولایت ته د خپل سفر په ترڅ کې ویلي چې د بامیان – غور لویې لارې د ۵۰ کیلومتره برخې بیارغولو چارې ژر پیلېږي.
د ټولګټو وزارت سرپرست ملا محمدعیسی ثاني پرون بامیان ولایت ته د خپل سفر په ترڅ کې د بامیان – غور له لویې لارې د لیدنې پر مهال ویلي چې دغه لویه لار د لومړي نمبر یکاولنګ ولسوالۍ د مرکز اړوند له نوکه لارې د «دشتقلعه» تر سرماقل سیمې پورې د دویمې درجې لویې لارې په ډول بیارغول کېږي.
هغه زیاته کړه، دغه لویه لار شاوخوا ۵۰ کیلومتره اوږدوالی لري چې بودجه یې د ټولګټو وزارت له لوري ورکول کېږي.
د بامیان والي مولوي عبدالله سرحدي ویلي، هغه لویې لارې چې بامیان، غور او دایکنډي ولایتونه سره نښلوي، ډېری برخې یې ویجاړې شوې او له امله یې خلک له ستونزو سره مخ دي.
هغه زیاته کړې، که دغه لویه لار ونه رغول شي، ښايي راتلونکی ژمۍ د استفادې وړ نه وي.
دغه راز، هغه د ټولګټو وزارت له سرپرسته وغوښتل چې د بامیان عمومي او فرعي سړکونو بیارغولو برخه کې هم پاملرنه وکړي.
Views: 23
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن