د عامې روغتیا وزارت سرپرست د یوه پلاوي په مشرۍ قطر ته ولاړ

کابل (پژواک، ۶ لړم ۱۴۰۲): د افغانستان د عامې روغتیا وزارت سرپرست د روغتیا په برخه کې د نړۍوالو مرستو جلبولو په موخه د یوه څلور کسیز پلاوي په مشرۍ قطر ته ولاړ.

د افغانستان د عامې روغتیا وزارت نن (شنبه، د لړم ۶ مه) د یوې اعلامیې په خپرولو سره ویلي چې د عامې روغتیا وزارت سرپرست ډاکتر قلندر عباد او ورسره مل پلاوی به د دغه سفر په ترڅ کې د قطر هېواد له لوړپوړو چارواکو او د نړۍوالو روغتیايي سازمانونو‎ او یو شمېر هېوادونو له استازو سره وګوري.‎

سرچينې ليکلي چې د دغه سفر موخه په هېواد کې د روغتيايي خدمتونو د معياري کولو لپاره د نړۍوالو همکاریو راجلبول دي.

د دغه وزارت ویاند ډاکتر شرافت زمان په یوه ویډیويي پیغام کې ویلي چې د دغه سفر موخه په روغتیا برخه کې د همکاریو جلبول دي.

هغه زیاته کړې چې د عامې روغتیا وزارت هڅه کوي څو هېواد کې د روغتیا سکټور معیاري شي ‎او دې موخې ته د رسېدو لپاره دا ډول سفرونه ډېر اړین دي.