کابل (پژواک، ۲۲ لړم ۱۴۰۲): د ازموینې ملي اداره وایي چې د ترکیې د ازموینې اداره د افغانستان کانکور ازموینې سیسټم د نوي کېدو په برخه کې همکارۍ ته چمتو ده او په دې اړه یوه پلاوي کابل ته سفر هم کړی دی.
نن د افغانستان او ترکیې د ازموینې ادارو چارواکو په کابل کې یوه ګډه ناسته ترسره کړه.
د ازموینو ملي ادارې تخنیکي سلاکار یما امان وایي چې د دې ادارې یو پلاوي څو ورځې مخکې ترکیې ته سفر کړی و، د ترکیې د امتحاناتو له سیسټمه یې لیدنه کړې او له هغې ادارې یې د افغانستان د ازموینو ملي په ادارې کې د یوه مجهز سیسټم د جوړولو غوښتنه کړې.
هغه وویل، ترکیه غواړي چې د افغانستان د ازموینو ملي ادارې لپاره یو مجهز سیسټم جوړ کړي؛ څو د ټولو ګډونوالو تعلیمي او تحصیلي مسایل، د بستونو نوماندان او ټولې ازموزینې له یوه مرکزي ځایه رهبري شي.
د هغه په خبره، ترکي پلاوی د افغانستان د ازموینو سیسټم د څېړنې په موخه کابل ته راغلی، د لوړو زدهکړو وزارت او د پوهنې وزارت له مسوولینو سره او له ځيني پوهنتونونو او ښوونځیو به لیدنه هم ولري، څو وکولای شي د هغو کاري سیسټمونه د خپلې ازموینې ملي ادارې له کاري سیسټم سره وګوري او د ستونزو په هواري کې همکاري وکړي.
نوموړي وویل، ترکیه د الکټرونیکي ازموینو اخیستو په برخه ۵۰ کلنه تجربه لري؛ په داسې حال کې چې افغانستان په دې برخه کې شپږ کلنه تجربه لري او د هغه هېواد د ازموینو د اخیستو سیسټم د سیمې په کچه یو معیاري سیسټم دی.
امان وویل چې پخوا د ازموینو ملي ادارې د لوړو زدهکړو وزارت په چوکاټ کې کار کاوه او یوازې یې د ښوونځیو له فارغانو ازموینه اخیسته؛ خو له مستقل کېدو وروسته اوس د ټولو هغو ازموینو مسوولیت چې د حکومت په چوکاټ کې اخیستل کېږي، لري.
د یادې ادارې سلاکار وویل، د ازموینو اوسنی سیسټم چې د یوه هندي شرکت له خوا جوړ شوی د ۲۵ ډوله ازموینو د اخیستو وړتیا لري چې اړتیاوو ته په کتو غواړي د هغه سیسټم ترکي سیسټم ته تغییر کړي.
په ورته وخت کې یاده ناسته کې د ترکیې شارژدافیر جنک اونال وویل، انقره غواړي چې خپلې اړیکي له افغانستان سره غښتلې کړي.
د هغه په خبره، ترکیه په بېلابېلو برخو کې تجربې لري چې هغو ته په کتو له افغانستان سره مرسته کوي.
د ازموینو ملي ادارې رییس شیخ عبدالباقي حقاني وویل چې افغانستان او ترکیه ډېر ګډ تعلقات لري او دغو مشترکاتو ته په کتو، افغانانو او ترکانو یو بل ته هر وخت د دوستۍ لاس ورکړی دی.
نوموړي وویل چې لازمه ده په افغانستان کې په بېلابېلو برخو کې کار وشي څو هېواد وکولی شي له نورو هېوادونو سره سیال شي.
دی وایي چې د افغانستان د ازموینو ملي اداره باید د ترکیې د ازموینو ملي ادارې په څېر له ټولو معیاري خدماتو سره جوړه شي.
بلخوا، د ترکیې د ازموینو ملي ادارې مرستیال هلیل شینګون وویل چې هېواد یې د ازموینو په اخیستو کې ۵۰ کلنه تجربه لري او هر کال په دغه هېواد کې په بېلابېلو برخو کې له ۱۵ میلیونو کسانو ازموینه اخلي.
Views: 41
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن