بامیان کې د ترافیکي پېښې له امله یو کس مړ او یو بل ټپي شوی

بامیان (پژواک، ۳۰ لړم ۱۴۰۲): بامیان کې ځايي مسوولین وايي، د دغه ولایت په شيبر ولسوالۍ کې د ترافیکي پېښې له امله یو کس مړ او یو بل ټپي شوی دی.

د بامیان امنیې قوماندانۍ ویاند محمدخواني رسا پژواک خبري اژانس ته وویل، له سړکه د یوه باروړونکي موټر وتلو له امله موټرچلوونکی مړ شوی او یو بل کس سخت ټپي دی.

د هغه په خبره، یاده پېښه پرون د شپې ناوخته د دغه ولایت د شيبر ولسوالۍ په کالو سیمه کې هله پېښه شوه چې باروړونکی موټر له سړکه ووت او له غره سره ولګېد.

نوموړي زیاته کړه، د شيبر ولسوالۍ امنیې قوماندانۍ پرسونل پر وخت د پېښې ځای ته رسېدلی او د پېښې ټپي یې د بامیان مرکزي روغتون ته لېږدولی دی.