کابل (پژواک، ۵ لېندۍ ۱۴۰۲): د کرنې، اوبولګولو او مالدارۍ وزارت وایي چې د دغه وزارت له پلاوي سره په لیدنه کې د ازبکستان سوداګرۍ وزارت چارواکو د دوه اړخیزو سوداګریزو اړیکو پر پراختیا ټینګار کړی دی.
دغه وزارت نن پر خپله اېکسپاڼه لیکلي، د کرنې، اوبولګولو او مالدارۍ وزارت او د افغانستان د کرنې او مالدارۍ خونې ګډ پلاوي ازبکستان ته د خپل سفر په ترڅ کې د دغه هېواد د سوداګرۍ او صنایعو خونې له چارواکو سره کتلي دي.
سرچینې ویلي، په دې کتنه کې د کرنې، اوبولګولو او مالدارۍ وزارت مرستیال مولوي صدراعظم عثماني ازبکستان ته د افغانستان د کرنیزو محصولاتو د صادراتو ډېرېدو په اړه خبرې کړې دي.
عثماني زیاته کړې: «افغانستان او ازبکستان دوه ګاونډي هېوادونه دي چې ګډې ګټې لري او موږ هم غواړو چې ازبکستان ته د خپل هېواد د مالدارۍ او کرنیزو محصولاتو صادرات ډېر کړو او په دې برخه کې شته ستونزو ته د پای ټکی کېږدو.»
سرچینې زیاته کړې، په دې کتنه کې د ازبکستان سوداګرۍ وزارت مرستیال د افغانستان او ازبکستان ترمنځ د سوداګریزو اړیکو د پراختیا یادونه وکړه.
هغه ویلي: «موږ د افغانستان له حکومت سره ډېرې ښې اړیکې لرو او هڅه کوو چې دا اړیکې نورې هم پراخې کړو، د افغانستان لپاره پر یوه نوي سیسټم کار کوو چې په پلي کېدو به یې افغانستان ته ډېرې اسانتیاوې رامنځته شي او په نږدې راتلونکي کې به یې اعلان کړو.»
دغه راز په دې کتنه کې د افغانستان د کرنې او مالدارۍ خونې مشر خانمحمد فروتن د سوداګرۍ ارزښت په اړه خبرې وکړې او له افغانستانه ازبکستان ته د کرنيزو او مالدارۍ محصولاتو صادراتو ستونزو د حل غوښتنه یې وکړه چې د دغه هېواد د چارواکو له خوا یې د حل ډاډ ورکړل شو.
د سرچینې معلوماتو له مخې، په دې کتنه کې د کرنې، اوبولګولو او مالدارۍ وزارت د مقام سلاکار محمدولي وزیري په ازبکستان کې د صنعت د ودې یادونه وکړه.
هغه د ازبکستان د سوداګرۍ او صنایعو خونې له مسوولینو غوښتنه وکړه څو خپل د اړتیا وړ خام مواد له افغانستانه وارد کړي؛ ځکه چې افغانستان د خامو موادو په تولید کې ښه پرمختګ کړی دی.
د یادونې ده، د لړم په ۳۰مه د افغانستان د کرنې، اوبولګولو او مالدارۍ وزارت د مرستیال په مشرۍ یو پلاوی د کرنې او مالدارۍ برخو کې د پانګوالو ترمنځ د اړیکو او همغږۍ پیاوړتیا په موخه ازبکستان ته سفر کړی دی.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن