کابل (پژواک، ۹ تله ۱۴۰۵): د صنعت او سوداګرۍ وزارت وایي چې د بلاروس چارواکو افغانستان ته د ماشینالاتو، په ځانګړې توګه د تراکتورونو، د کانونو په استخراج کې د کارېدونکو وسایلو او وسایطو د تولیدوونکو شرکتونو د نمایندهګیو رالېږدولو لېوالتیا ښودلې ده.
دغه وزارت نن پر خپله اېکسپاڼه لیکلي چې نورالدین عزیزي د یوه پلاوي په مشرۍ بلاروس جمهوریت ته د رسمي سفر په ترڅ کې د دغه هېواد د صنعت له وزیر سره لیدلي دي.
سرچینې زیاته کړې چې په دې لیدنه کې د تولیدي کارخونو جوړولو، د صنعتي او سوداګریزو همکاریو د پراختیا، د افغانستان – بلاروس سوداګریز فورم د منظم جوړېدو او د دواړو هېوادونو د اقتصادي کمېسیون د مطرح شوو موضوعاتو د تعقیب په اړه خبرې او نظرونه تبادله شوي دي.
د صنعت او سوداګرۍ وزارت وايي چې بلاروسي لوري په دغه هېواد کې د صنعت په نړۍوال نندارتون کې د افغانستان د ګډون له امله د مننې ترڅنګ، افغانستان ته د ماشینالاتو، په ځانګړې توګه د تراکتورونو، د کانونو د استخراج برخه کې د کارېدونکو وسایلو او وسایطو د شرکتونو د نمایندهګیو د لېږد لېوالتیا ښودلې ده.
دغه وزارت ویلي چې د بلاروس جمهوریت دویم نړۍوال صنعتي نندارتون د بېلابېلو هېوادونو د شاوخوا ۵۰۰ شرکتونو په ګډون جوړ شوی او د اروپايي او اسیایي هېوادونو یو شمېر وګړي هم ترې لیدنه کوي.
