کندهار (پژواک، ۶ لېندۍ ۱۴۰۲): یو شمېر چیني سوداګرو کندهار ته د سفر پرمهال ویلي، غواړي چې له دغه ولایته خپل هېواد ته د انارو صادرات پیل کړي.
دغه څرګندونې په هغې خبرپاڼې کې شوې چې د لېندۍ په ۶مه د کندهار د سوداګرۍ خونې له لوري پژواک ته را لېږل شوې ده.
په خبرپاڼه کې راغلي چې د دوشنبې په ورځ یو شمېر چینايي سوداګرو کندهار ته سفر کړی وو او د دغه ولایت د سوداګرۍ خونې له رییس او نورو سوداګرو سره يې ليدلي دي.
سرچینه وایي چې د دې ناستې پر مهال چینايي سوداګرو ویلي، پلان لري چې له کندهاره چین ته انار صادر کړي او سوداګریزي اړیکې پراخې کړي.
چینايي سوداګرو دا هم ویلي، دوی غواړي د خپل سفر به ترڅ کې معلومه کړي چې هېواد يې د افغانستان کومو توکو ته اړتیا لري څو دوی يې صادرات پیل کړي.
دغو سوداګرو ویلي، هڅه کوي چې نور چینايي سوداګر هم په کندهار او نورو ولایتونو کې پانګونې ته وهڅوي څو د دواړو هېوادونو ترمنځ سوداګریزې اړیکې پراخې شي.
په یاده ناسته کې د کندهار د سوداګرۍ خونې مسوولینو ویلي چې د چین او افغانستان ترمنځ سوداګري د دواړو هېوادونو پر اقتصاد ښه اغېز لرلای شي او اوسمهال د سوداګرۍ زیاتوالي ته ښه زمینه برابره ده.
له دې مخکې هم یو شمېر چینايي سوداګرو کندهار ته سفر کړی وو او په دغه ولایت کې د پانګونې په اړه څرګندونې کړې وې، خو تر اوسه يې کومه پانګونه نه ده کړې.
Views: 811
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن