کابل (پژواک، ۲۶ لېندۍ ۱۴۰۲): مولوي امیرخان متقي هرات کې د ترکمنستان بهرنیو چارو له وزیر سره په ليدنه کې د افغانستان په خاوره کې د ټاپي پروژې د لېږد پر لارو، تورغونډۍ بندر کې د رېلپټلۍ سټېشن پر پراختیا او د هرات د نورالجهاد برق سبسټېشن د ظرفیت لوړولو په اړه خبرې کړې دي.
د افغانستان بهرنيو چارو وزارت مرستیال ویاند حافظ ضياءاحمد تکل پر خپله اېکسپاڼه ليکلي چې تېر ماښام د افغانستان د بهرنیو چارو وزیر مولوي امیرخان متقي او د ترکمنستان بهرنیو چارو وزیر رشید مُرَدوف په مشرۍ د دواړو هېوادونو پلاوي د تورغونډۍ بندر، د افغانستان خاوره کې د ټاپي نلليکې او نورالجهاد سبسټېشن له کتنې وروسته د دوه اړخیزې سوداګرۍ، ترانزیټ او ترانسپورټ کې د اسانتیاوو رامنځته کولو په اړه خبرې کړې دي.
سرچینه زياتوي، په دې لیدنه کې مقتي وویل چې په افغانستان کې د جګړې له پای او نوي حکومت له جوړېدو وروسته اوس د دې فرصت رامنځ ته شوی چې د ټاپي ستره پروژه له لسیزو ځنډ وروسته د دواړو لوریو په ګډو هڅو عملاً پیل شي.
هغه د افغانستان له لوري د چمتووالي په اړه ډاډ ورکړ او ويې ویل: «د افغانستان په خاوره کې د ټاپي نلليکې د کيندنې د پیل لپاره د افغانستان اړوندو ارګانونو خپلې ټولې چارې بشپړې کړي دي او په تمه یو چې عملي کار پیل شي.»
متقي د دواړو هېوادونو ترمنځ د دوه اړخیزې سوداګرۍ او ترانزیټ پر زیاتوالي د ټینګار ترڅنګ هیله څرګنده کړه چې په تورغونډۍ بندر کې د مالونو انتقالات ۲۴ ساعته شي.
په ياده ناسته کې د کانونو او پټرولیم وزیر شیخ شهابالدین دلاور د ټاپي پروژې اهمیت ته په ټینګار سره وویل چې د افغانستان په خاوره کې د نلليکې د کیندنو کار دې عملاً پیل شي.
دغه راز د صنعت او سوداګرۍ وزیر نورالدین عزیزي د دواړو هېوادونو ترمنځ د سوداګرۍ کچې لوړولو او د ترانزیټ اسانتیاوو رامنځته کولو په اړه خبرې وکړې او ويې ویل چې نږدې راتلونکي کې به په عشقاباد کې د افغان توکو یو نندارتون جوړ کړي.
د ترکمنستان بهرنیو چارو وزیر رشید مُرَدوف په خپل وار په ګڼو برخو کې د افغانستان او ترکمنستان د دوو اړخیزو اړیکو پر پراختیا د ټينګار ترڅنګ وویل چې هېواد يې هم په نږدې راتلونکي کې د افغانستان په خاوره کې د ټاپي پروژې د کار د پیل په اړه چمتووالی لري.
هغه زياته کړه، د افغانستان او ترکمنستان ترمنځ د سوداګرۍ د پراختیا لپاره باید دواړه لوري د یوه جامع لار نقشه رامنځته او پلې کړي.
مُرَدوف وویل چې هېواد یې غواړي چې افغانستان سره ګډه سوداګري تر یو میلیارد ډالرو پورې لوړه کړي.
هغه په عشقاباد کې د افغان توکو د نندارتون په اړه هم تیاری وښوده.
Views: 166
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن