غزني ښار (پژواک، ۹ سلواغه ۱۴۰۲): د غزني د سیندیزې فرعي حوزې مسؤولین وايي، په مرکز او یو شمېر ولسوالیو کې یې د شلو لویو چکډیمونو جوړولو چارې پیل کړې دي.
د غزني سیندیزې فرعي حوزې د ولاړو اوبو ریاست تخنیکي مسوول انجینر محمدنذیر سهار پژواک خبري اژانس ته وویل، روان کال کې یې په مرکز او یو شمېر ولسوالیو کې د شاوخوا۸۰ میلیون افغانیو په ارزښت د شلو لویو چکډیمونو جوړولو چارې پیل کړې چې ځیني یې بشپړ شوي هم دي.
د نوموړي په خبره، د یادو چکډیمونو د جوړېدو لګښت د اوبو او برېښنا وزارت او یو شمېر مؤوسسو له لوري ورکول کېږي.
هغه وايي، د یاد شمېر چکډیمونو چارې د غزني په مرکز، ناور، اندړو، جغتو، خوګیاڼي، واغظ، رشیدانو او جاغوري ولسوالیو کې پیل شوې وې چې د DRC یا د ډنمارک د کډوالو شورا اړوند د ټولو چکډیمونو کارونه بشپړ شوي دي.
نوموړی زیاتوي، د یادو چکډیمونو د جوړېدو موخه د بارانونو او سېلابونو اوبو مدیریت کول دي.
ورته مهال د دغه ولایت اوسېدونکي هیله څرګندوي چې د یادو چکډيمونو له جوړېدو سره به د وچکالۍ له امله د اوبو د کمښت ستونزه حل شي.
د معلوماتو له مخې، د غزني ۸۵ سلنه خلک پر کرنه او مالدارۍ بوخت دي چې ډېر کله د اوبو له کمښته شکایت کوي.
GET IN TOUCH
NEWSLETTER
SUGGEST A STORY
PAJHWOK MOBILE APP