<p style="text-align: justify;">کابل (پژواک، ۱۳ سلواغه ۱۴۰۲): سیګار یا د افغانستان بیارغونې لپاره د امریکا د څار ځانګړې ادارې د امریکا کانګرس ته د خپل درې میاشتنې راپور په وړاندې کولو سره ویلي، متحده ایالاتو له افغانستانه له وتلو وروسته، له دغه هېواد سره ۱۱ اعشاریه ۲۱ میلیارد ډالره مرسته کړې ده.</p>
<p style="text-align: justify;">یادې ادارې په خپل تازه راپور کې چې پرون (د سلواغې ۲۱مه) خپور شو، افغانستان ته د امریکا د مرستو په اړه جزییات ورکړي او اقتصادي او امنیتي وضعیت او د ښځو شرایط یې څېړلي دي.</p>
<p style="text-align: justify;">سیګار لیکلي، متحده ایالاتو د ۲۰۲۱ له اکتوبر څخه د ۲۰۲۳ تر دسمبره افغانستان ته څه باندې دوه میلیارد او ۶۲۵ میلیون ډالر ځانګړي کړي او دغه راز د دغه هېواد د دفاع وزارت هم د بشردوستانه، طبیعي پېښو او مدني مرستو په برخو کې د ۲۰۲۳ تر سپتامبره څه باندې پنځه میلیارد او ۸۲ میلیون ډالر مصرف کړي دي.</p>
<p style="text-align: justify;">د راپور له مخې، سویس کې د افغانستان د مرکزي بانک له پانګو څخه اماني صندوق ته د ۳،۵ میلیارد ډالرو لېږد هم په دغو مرستو کې شامل دی.</p>
<p style="text-align: justify;">یادې مرستې د زدهکړې، خوړو، روغتیا، کرنې او له بشري حقونو څخه د ملاتړ برخو کې مصرف شوې دي.</p>
<p style="text-align: justify;">یادې ادارې د اسلامي امارت تر واکمنۍ لاندې د افغانستان د خلکو اقتصادي وضعیت څېړلی او ویلي یې دي چې په دغه هېواد کې بشري مرستو ته د اړمنو کسانو شمېر په تېر کال کې له ۲۸ اعشاریه ۳ میلیون کسانو څخه روان ۲۰۲۴ کال کې ۲۳ اعشاریه ۷ میلیون کسانو ته راټیټ شوی دی.</p>
<p style="text-align: justify;"></p>
