ترینکوټ (پژواک، ۲۲ کب ۱۴۰۲): د اروزګان د اطلاعات او فرهنګ ریاست مسوولین وايي، د دغه ولایت چهارچینو ولسوالۍ کې لسګونه لرغوني اثار موندل شوي دي.
د اروزګان د اطلاعات او فرهنګ رییس قاري اغاولي قریشي وایي، د دغه ولایت د چهارچینو ولسوالۍ په مغزاباد سیمه کې د سیمې د یوه اوسېدونکي له لوري د ځمکې اړولو پر مهال لسګونه بېلابېل ډوله لرغوني اثار موندل شوي دي.
هغه زیاتوي، یادو اثارو کې ۷۶ غټې او وړې مرۍ، درې جامونه، دوه د دیګ سرپوښونه، یو تبر او یو شمېر نور لرغوني توکي شامل دي.
د نوموړي په خبره، تراوسه د تازه موندل شوو اثارو د ارزښت او لرغونتوب په اړه کره معلومات نهلري، خو د څېړنې په موخه یې له مرکز څخه د یوه تخینکي ټیم د ورتګ غوښتنه کړې ده.
هغه د دغه ولایت له خلکو غواړي چې د تاریخي ابداتو د ساتنې ترڅنګ دې د اثارو موندلو برخه کې هم له دوی سره همکاري وکړي.
Views: 40
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن