قلعهنو (پژواک، ۳۱ غویی ۱۴۰۳): د بادغیس د اطلاعاتو او فرهنګ ریاست په دغه ولایت کې د لومړني موزیم له پرانیستلو خبر ورکوي او وايي، په دغه موزیم کې ۲۴۰ قلمه تاریخي او لرغوني اثار نندارې ته اېښودل شوي دي.
د بادغیس د اطلاعاتو او فرهنګ ریاست امر عبدالاول حبیبي پژواک خبري اژانس ته وویل، په دغه موزیم کې چې د اطلاعاتو او فرهنګ ریاست د ودانۍ په یوه خونه کې جوړ شوی، ۲۴۰ قلمه تاریخي او لرغوني اثار نندارې ته وړاندې شوي دي.
د هغه په خبره، په دغه موزیم کې اېښودل شوي اثار شاوخوا پنځه زره کلنه مخینه لري.
هغه وویل، د یاد موزیم د جوړولو لګښت ۲۰۰ زره افغانۍ دی او زیاته یې کړه: «دا یو پیل دی او په ۱۴۰۳ کال کې زموږ یو پلان د دغه موزیم پرختیا ده.»
نوموړي زیاته کړه، په دغه موزیم کې لرغوني اثار به د سیلانیانو او لیدونکو د جذب په برخه کې اغېزناک تمام شي.
د بادغیس اوسېدونکي د دغه موزیم جوړول ستایي او د هغه د پراختیا غوښتنه کوي.
د قلعهنو ښار یو اوسېدونکی عبدالرحمن وايي: «ډېر خوشحاله یم چې دغه موزیم په بادغیس کې جوړ شوی، خو زموږ غوښتنه دا ده چې دولت موزیم په یوه ځانګړي تعمیر کې جوړ کړي څو هر څوک په اسانۍ د هغه لیدو ته ورشي.»
په همدې حال کې، د دغه ولایت بل اوسېدونکی ګلاحمد هم د دغه موزیم له جوړېدو هرکلی کوي او وايي: «دولت او مسوول بنسټونه باید د یوه معیاري موزیم جوړولو برخه کې د اطلاعاتو او فرهنګ له ریاسته په جلا ځای کې اقدام وکړي.»
بادغیس د هېواد له هغو ولایتونو دی چې لسګونه تاریخي اثار او ابدې پهکې موجود دي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن