پکتیکا او فراه کې د نږدې ۴۰ میلیون افغانیو په ارزښت د دوو پروژو چارې پیل شوې

کابل (پژواک، ۳ غبرګولی ۱۴۰۳): ځايي مسوولین وايي، د پکتیکا په شخېل‌اباد ولسوالۍ کې د اوبو د یوه بند او د فراه په مرکز کې د یوه سړک جوړولو چارې پیل شوې.

د اوبو او برېښنا وزارت وايي، د پکتیکا په شخېل‌اباد ولسوالۍ کې د څه باندې ۱۲ میلیون افغانیو په لګښت د اوبو یوه بند جوړولو چارې پیل شوې.

یاد وزارت نن پر خپله اېکس‌پاڼه لیکلي، دغه بند د ګومل سیندیزې فرعي حوزې ادارې تر څارنې لاندې د ۱۲۰ مترو په اوږدوالي، ۵۶ مترو په سور او ۱۰ مترو په لوړوالي په خام ډول جوړېږي چې چارې به یې په شپږو میاشتو کې بشپړې شي.

سرچینې لیکلي، دغه بند به د سل زره مترمکعب اوبو ذخیره کولو ظرفیت ولري.

ورته مهال، د فراه ښاروال مولوي محمدولي ادریس وايي، فراه ښار کې یې نن د دوو سړکونو جوړولو چارې پیل کړې دي.

هغه وویل، د یونیم کیلومتر په اوږدوالي دغه سړکونه د فراه ښاروالۍ په مالي لګښت جوړیږي چې چارې به یې په پنځو میاشتو کې بشپړې شي.

د هغه په خبره، پر یادو سړکونو ۲۸ میلیون افغانۍ لګښت راځي چې دوه اړخیز څراغونه او ګل‌دان هم په‌‌کې شامل دي.