کابل (پژواک، ۱۰ غبرګولی ۱۴۰۳): د خوړو نړۍوال پروګرام (ډبلیواېفپي) ویلي چې اروپایي ټولنې د هېواد د ښوونځيو د زدهکوونکو د خوړو خونديتوب لپاره ۱۰ میلیونه یورو ځانګړې کړې دي.
دغه سازمان په یوه خبرپاڼه کې لیکلي چې دغه مرستې د هېواد بېلابېلو ولایتونو کې د څه باندې ۱۰ زرو ښوونځيو زدهکوونکي تر پوښښ لاندې نیسي.
دغه خبرپاڼه کې راغلي چې د اروپایي ټولنې د اضافي مرستو پر مټ د ۱۰ زرو ښوونځيو زدهکوونکو ته غني شوي بیسکویټ او یا محلي مغذي خواړه وېشل کېږي.
دغهراز، د خوړو نړۍوال پروګرام زیاته کړې چې د څلورم او شپږم ټولګي زدهکوونکې به هم د نغدو پیسو او نباتي غوړیو مرستې ترلاسه کړي.
د دغه بنسټ په خبره، لوږه کولای شي د زدهکړې مانع شي، خو د اروپایي ټولنې مرستې تضمینوي چې په افغانستان کې ډېر ماشومان مغذي خواړه تر لاسه کړي.
دا مرستې په داسې حال کې شوې دي چې اروپایي ټولنې د روان کال وري میاشتې کې په افغانستان کې د ماشومانو د زدهکړې ملاتړ په موخه د ۲۵ میلیون یورو مرستو خبر ورکړی و.
GET IN TOUCH
NEWSLETTER
SUGGEST A STORY
PAJHWOK MOBILE APP