<p style="text-align: justify;">لښکرګاه (پژواک، ۱۳ غبرګولی ۱۴۰۳): د هلمند ځايي مسوولین وایي، په دغه ولایت کې له تېرو درېیو کلونو راهیسې ۱۰۵ نوې صنعتي فابریکې جوړې شوې او نږدې پنځه زره کسانو ته پهکې په مستقیم ډول د کار زمینه برابره شوې ده.</p>
<p style="text-align: justify;">د هلمند د سوداګرۍ او پانګونې خونې مشر غلام یحی پښتون پژواک خبري اژانس ته وویل، واک ته د اسلامي امارت له رسېدو وروسته په دغه ولایت کې د سوداګرۍ او پانګونې لپاره ښه او مناسب فرصتونه برابر شوي دي.</p>
<p style="text-align: justify;">نوموړي زیاته کړه: «ډېر کسان دې ته اماده شوي چې د خصوصي سکټور برخه کې پانګونه وکړي او بې روزګاره کسانو ته د کار زمینه برابره کړي، هغه خام مواد چې موږ لرو، هغه هم دلته پروسس شي.»</p>
<p style="text-align: justify;">ورته مهال، د دغه ولایت د صنعت او سوداګرۍ ریاست د صنعتي ښارګوټو او سوداګریزو فعالیتونو برخې امر مولوي فضلمحمد فضلي وايي، د اسلاميامارت له واکمنېدو وروسته په دغه ولایت کې د پانګهوالو شمېر ډېر شوی دی.</p>
<p style="text-align: justify;">د هغه په خبره، په تېرو نږدې درېیو کلونو کې په دغه ولایت کې ۱۰۵ نوې صنعتي فابریکې جوړې شوې چې په بېلابېلو برخو کې فعالیت کوي.</p>
<p style="text-align: justify;">نوموړي زیاته کړه، واک ته د اسلامي امارت له رسېدو مخکې په دغه ولایت کې یوازې ۴۵ فابریکې فعالې وې.</p>
<p style="text-align: justify;">هغه وویل: «هلمند کې اوس د پنبې، شامپو، غوړیو، صابون، تختو، رب، د چرګانو دانې او خوراکي توکو بېلابېلې کارخونې فعالیت کوي چې ټولیز شمېر یې ۱۵۰ ته رسېږي. «</p>
<p style="text-align: justify;">نوموړي دغه راز وویل، په یادو کارخونو کې ۴۵۰۰ کسانو ته په مسقیم ډول د کار زمینه برابره شوې ده.</p>
<p style="text-align: justify;">فضلي وویل: «د صنعت او سوداګري ریاست مسوولین هڅه کوي په دغه لایت کې ټولو صنعتکارانو او پانګوالو ته اسانتیاوې رامنځته کړي، د هغوی امنیت ساتنې پاملرنه او تولیداتو ته یې په کور دننه او بهر بازارموندنه وکړي.»</p>
<p style="text-align: justify;">ورته مهال، هغه کسان چې په یادو فابریکو کې په کار بوخت دي، خوښ دي او زیاتوي چې له دې لارې په اسانۍ د خپلو کورنیو اړتیاوې پوره کولی شي.</p>
<p style="text-align: justify;">اخترمحمد چې د مالوچو پروسس یوه کارخونه کې پهکار بوخت دی وايي: «موږ زیات خوشاله یو چې دلته فابریکه کې کار راته پیدا شوی، مخکې بېکاره وو، اوس له همدې لارې خپل د کور لګښتونه پوره کوو.»</p>
<p style="text-align: justify;">د نجیبالله په نوم یو بل ځوان چې د پایپ جوړولو په فابریکه کې کار کوي وایي: «خوشاله یم چې دلته کار کوم، غوښتنه مې دا ده چې نورې هم داسې فابریکې جوړې شي.»</p>
<p style="text-align: justify;">د یاد ولایت اوسېدونکي وايي، که دغه ډول فابریکې ډېرې شي، زرګونه اوزګارو کسانو ته به ورسره د کار زمینه برابره شي.</p>
