کابل (پژواک، ۱۸ غبرګولی ١٤٠٣): د ا.ا د عدلیې وزارت وايي، د تمدن ټلوېزیون، خاتمالنبیین مدرسې او خاتمالنبیین پوهنتون فعالیت له دې امله درول کېږي چې «د افغانستان حرکت اسلامي» په لغوه شوي ګوند پورې تړاو لري او ودانۍ یې هم په غضب شوې ځمکه کې جوړې شوې دي.
خو د تمدن ټلوېزیون عمومي رییس او د خاتمالنبیین پوهنتون د امتیاز خاوند محمدجواد محسني وايي، د تمدن ټلوېزیون شبکه په هغه ځمکه چې له مالک څخه یې اخیستل شوې، جوړه شوې او شرعي قباله لري او یاد بنسټونه په کوم ګوند پورې اړه نهلري.
نوموړي د يوه پلاوي له لوري د دې موضوع د بېطرفه څېړلو غوښتنه کړې ده.
تمدن ټلوېزیون پرون پنجشبنه له غرمې وروسته یو خبر خپور کړ چې د عدلیې وزارت یو پلاوی د دغه ټلوېزیون فعالیت درولو په موخه د یادې رسنۍ دفتر ته ورغلی دی.
خو وروسته تمدن ټلوېزیون خبر ورکړ چې دغه پرېکړه د حکومتی چارواکو په منځګړیتوب تر راتلونګې شنبې ورځې وځنډول شوه.
د عدلیې وزارت ویاند برکتالله رسولي تېره شپه پر خپله ایکسپاڼه د یوې اعلامیې په خپرولو سره ویلي، د تمدن ټلوېزیون فعالیت په سیاسي ګوند پورې د تړاو او له غصب شوې امارتي ځمکې د استفادې له امله درول کېږي.
په اعلامیه کې راغلي چې د اسلامي امارت د عدلیې وزارت له دې مخکې په هېواد کې د سیاسي ګوندونو پر هر ډول فعالیت بندیز لګولی و او د دې پریکړې له مخې، په هېواد کې سیاسي ګوندونه لغوه دي او د هغوی اړوند رسنۍ هم د فعالیت حق نهلري.
سرچینه زیاتوي: «تمدن ټلوېزیون، خاتمالنبیین مدرسه او خاتمالنبیین پوهنتون "د افغانستان حرکت اسلامي" لغوه شوي ګوند پورې تړوا لري او ودانۍ یې هم په غصب شوې امارتي ځمکه کې جوړې شوې دي او له همدې امله د یادو درېواړو بنسټونو فعالیتونه بند او دفترونه یې د عدلیې وزارت له لوري تړل کېږي.»
دغه وزارت ليکي، له همدې امله پرون پنجنشه د عدليې وزارت يو پلاوى د تمدن ټلوېزيون دفتر ته ورغلى و او مسوولينو ته يې خبر ورکړ چې د دغه ټلوېزيون فعاليت بند او دفتر یې تړل کېږي.
عدلیې وزارت یو ځل بیا څرګنده کړې چې په هېواد کې د سیاسي ګوندونو پر فعالیت بندیز لګېدلی او له هر ډول ګوندي فعالیت سره شرعي او قانوني چلند کېږي.
خو د تمدن ټلوېزیون عمومي رییس او د خاتمالنبیین پوهنتون د امتیاز خاوند محمدجواد محسني د عدلیې وزارت د دغې اعلامیې په ځواب کې ویلي، د تمدن ټلوېزیون شبکه په هغه ځمکه جوړه شوې چې له شخصي مالک نه یې اخیستل شوې ده، شرعي او قانوني قباله لري او د دې رسنۍ ځمکه په هېڅ ډول دولتي نه وه او نه ده.
نوموړی زیاتوي، د خاتمالنبیین مدرسې ځمګه هم د تېر حکومت پرمهال په رسمي توګه او شرعي قبالې په درلودو د اږدو قانوني مراحلو په طی کولو سره د مدرسې، جومات، کتابتون، د اسلامي څېړنو د مرکز، د طلابو لپاره د لیلیې او کنفرانسونو د تالار جوړولو په موخه د ایتالله محمداصف محسني په واک کې ورکړل شوې چې اسناد، مدارک او شرعي قباله یې هم شته او کولای شي ویې څېړي.
دغهراز هغه ویلي چې خاتمالنبیین پوهنتون هم په یوه کرایه ودانۍ کې فعالیت کوي او خپل ملکیت او جایداد نهلري.
هغه زیاته کړې، د یادو بنسټونو رامنځتهکوونکی محمداصف محسني په ۱۳۸۴ لمریز کال کې د ګوند د کنګرې په غونډه او د ټولو رسنیو په مخ کې له حرکت اسلامي ګوند څخه په رسمي او علني توګه استعفا وکړه او د تل لپاره یې ګوندي او سیاسي فعالیتونه پرېښودل او یوازې د یوه عالم په توګه د خلکو په خدمت کې و او د هغه د استعفا رسمي اسناد د عدلیې په وزارت کې د حرکت اسلامي ګوند په دوسیه کې دي او کولای شي ویې څېړي.
د هغه په خبره، د تمدن ټلوېزيون او خاتمالنبيين پوهنتون د محسني له رسمي استعفا وروسته جوړ شول چې هغه مهال یې د ګوند غړیتوب او مشري پرغاړه نه درلوده.
هغه وایي: « د اسلامي امارت محترم مشران او د عدلیې محترم وزارت دې د یادو ټولو اسنادو څېړلو لپاره یو پلاوی وټاکي څو دغه اسناد په بېطرفانه توګه وڅېړل شي او له مخې یې لازمې پرېکړې وشي.»
GET IN TOUCH
NEWSLETTER
SUGGEST A STORY
PAJHWOK MOBILE APP